ரஷ்யா - உக்ரைன் அமைதி ஒப்பந்தம் ஏற்படுத்துவதற்கு அமெரிக்கா விதித்த காலக்கெடு நாளையுடம் முடிவடைய உள்ளது. இந்த நிலையில், அமெரிக்க ஜனாதிபதியின் சிறப்பு தூதர் ஸ்டீவ் விட்காப் ரஷ்ய தலைநகர் மாஸ்கோவில் நேற்று ரஷ்ய ஜனாதிபதி புடினை சந்தித்து பேச்சுவார்தை நடத்தினார்.
உக்ரைனில் ரஷ்யாவின் தாக்குதலை முடிவுக்கு கொண்டு வரவேண்டும் என்பதில் அமெரிக்க ஜனாதபதி ட்ரம்ப் மிக தீவிரமாக உள்ளார்.
இதற்காக உக்ரைனுடன் ஒரு அமைதி ஒப்பந்தத்தை மேற்கொண்டு போரை நிறுத்த வேண்டி ரஷ்யாவுக்கு 50 நாட்கள் வரை காலக்கெடு விதிப்பதாக ட்ரம்ப் தெரிவித்தார். இல்லையெனில் கடுமையான பொருளாதார அபராதங்களை ரஷ்யா எதிர்கொள்ள நேரிடும் என்றும் அவர் எச்சரிக்கை விடுத்தார்.
ட்ரம்ப் விதித்த காலக்கெடு நாளையுடன் முடிவடைய உள்ள நிலையில் நேற்று அவரது சிறப்பு தூதர் ஸ்டீவ் விட்காப் அவசர அவசரமாக ரஷ்யாவுக்கு சென்று புடினை சந்தித்துப் பேச்சுவார்த்தை நடத்தியுள்ளதாக ரஷ்ய அதிபரின் கிரெம்ளின் மாளிகை தெரிவித்துள்ளது.
எனினும், இந்த பேச்சுவார்த்தையில் என்னென்ன முக்கிய அம்சங்கள் இடம்பெற்றன என்பது குறித்த விவரங்களை ரஷ்ய ஜனாதிபதி மாளிகை உடனடியாக வெளியிடவில்லை.
