2024 ஒலிம்பிக் போட்டிகளில் ஆஸ்திரேலிய வீர, வீராங்கனைகள் சிறப்பாக செயற்பட்டு பதக்க வேட்டை நடத்தியுள்ளனர். 18 தங்கம், 19 வெள்ளி மற்றும் 16 வெண்கலம் என 53 பதக்கங்களை ஆஸ்திரேலியா பெற்று, ஒலிம்பிக் போட்டி தொடரில் நான்காவது இடத்தை பிடித்துள்ளது. கடந்த காலங்களுடன் ஒப்பிடுகையில் இம்முறையில் ஆஸ்திரேலியா சிறந்த நிலையில் உள்ளது.
ஒலிம்பிக் போட்டிகளை ஆஸ்திரேலியர்கள் வெற்றிகரமாக நிறைவுசெய்துள்ளனர் என தெரிவித்து, அனைவருக்கும் வாழ்த்துகளை தெரிவித்துள்ளார் பிரதமர். தனது எக்ஸ் தளத்தில் பதக்க பட்டியலையும் பதிவிட்டுள்ளார்.
33-வது ஒலிம்பிக் திருவிழா பிரான்ஸ் தலைநகர் பாரிசில் கடந்த மாதம் 26 ஆம் திகதி கோலாகலமாக ஆரம்பமானது. இந்த போட்டியில் 206 நாடுகளை சேர்ந்த 10,714 வீரர், வீராங்கனைகள் பங்கேற்றனர்.
இந்நிலையில் கடந்த இரு வாரங்களாக விளையாட்டு ரசிகர்களுக்கு விருந்து படைத்து வந்த ஒலிம்பிக் தொடரின் போட்டிகள் நேற்று நிறைவு பெற்றன. ஒலிம்பிக் தொடரின் நிறைவு விழாவும் சிறப்பாக நடந்து முடிந்துள்ளது.
பதக்கப்பட்டியலில் 40 தங்கம், 44 வெள்ளி மற்றும் 42 வெண்கலம் என அமெரிக்கா முதல் இடம் பிடித்துள்ளது.
40 தங்கம், 27 வெள்ளி மற்றும் 24 வெண்கலம் என சீனா இரண்டாவது இடத்தையும், 20 தங்கம், 12 வெள்ளி, 13 வெண்கலம் என ஜப்பான் மூன்றாம் இடத்தையும் பிடித்துள்ளன.
