சாலமன் தீவுகளின் புதிய பிரதமர் மேத்யூ வேல், பசிபிக் பிராந்தியத்திற்கான ஒரு புதிய பாதுகாப்பு ஒப்பந்தத்தை முன்மொழிந்துள்ளார்.
இந்த நடவடிக்கை இப்பிராந்தியத்தில் குறிப்பிடத்தக்க மூலோபாய தாக்கங்களை ஏற்படுத்தக்கூடும் என எதிர்பார்க்கப்படுகிறது.
பசிபிக் தீவுகளின் கூட்டமைப்பிற்கு (PIF) தலைவராகவும் இருக்கும் மேத்யூ வேல் , ஜூன் மாத தொடக்கத்தில் ஆஸ்திரேலியப் பிரதமர் அந்தோனி அல்பானிஸை சந்தித்தபோது இந்த யோசனையை முன்மொழிந்துள்ளார் என தெரியவருகின்றது.
பிரதமராகப் பதவியேற்றது முதலே மேத்யூ வேல் , ஆஸ்திரேலியாவை நோக்கி ஒரு கூர்மையான மாற்றத்தை வெளிப்படுத்தி வருகிறார்.
புதிய ஒப்பந்தம் ஒன்றிற்கான பேச்சுவார்த்தைகளைத் தொடங்கியுள்ள அவர், சீனா-சாலமன் தீவுகள் இடையேயான சர்ச்சைக்குரிய பாதுகாப்பு உடன்படிக்கையை மறுபரிசீலனை செய்வதாகவும் உறுதியளித்துள்ளார்.
எனினும், அந்த உடன்படிக்கையின் உரையை பகிரங்கமாக வெளியிடுவோம் என்ற தனது முந்தைய வாக்குறுதியிலிருந்து அவர் இப்போது பின்வாங்கியுள்ளார்.
சீனா சாலமன் தீவுகளின் மதிப்புமிக்க பொருளாதாரப் பங்காளியாக இருப்பதாகவும், "அனைவருக்கும் நண்பன், எவருக்கும் எதிரியல்ல" என்ற கொள்கையைப் பின்பற்ற விரும்புவதாகவும் கூறி, அவர் சீனாவை விமர்சிப்பதில் கவனமாக இருந்து வருகிறார்.
இருப்பினும், பசிபிக் பிராந்தியத்தின் பாதுகாப்பில் சீனா ஒரு முக்கிய பங்கை வகிக்கக் கூடாது என்றும், பசிபிக் நாடுகளே வழிநடத்தும் ஒரு பாதுகாப்பு கட்டமைப்பு இருக்க வேண்டும் என்றும் ஆஸ்திரேலியா கொண்டுள்ள அதே நிலைப்பாட்டை வேலும் பகிர்ந்து கொள்கிறார் என்பதை ஏபிசி செய்தி நிறுவனம் அறிந்துள்ளது.
பிராந்திய ஒற்றுமையை வலுப்படுத்துவதற்கான ஒரு வழியாக பசிபிக் பிராந்தியம் முழுமைக்கு
மான பாதுகாப்பு ஒப்பந்தம் குறித்த யோசனையை திரு. வேல் எழுப்பியதாகத் தெரிகிறது.
மேலும், இந்த ஆண்டு செப்டம்பர் மாதம் வரை பசிபிக் தீவுகளின் கூட்டமைப்பின் (PIF) தலைவர் பதவி அவரிடம் இருப்பதால், இந்த முன்மொழிவு மீதான முறையான விவாதங்களைத் தொடங்குவதற்கு அவர் ஒரு வலுவான நிலையில் உள்ளார்.
ஆஸ்திரேலியா தற்போது சாலமன் தீவுகளுடன் நேரடி இருதரப்பு உறவுகளை வளர்ப்பதிலேயே அதிக கவனம் செலுத்தி வருகிறது.
இந்த முன்னெடுப்பு ஆசிய-பசிபிக் பகுதியில் நிலவும் புவிசார் அரசியல் சூழலில் ஒரு முக்கியமான மாற்றமாகப் பார்க்கப்படுகிறது. இத்திட்டத்தின் சட்டப்பூர்வத்தன்மை மற்றும் நோக்கம் குறித்து இன்னும் தெளிவான முடிவுகள் எடுக்கப்படவில்லை.
