பிரபல நிதி நிபுணர்களின் பெயர்களைப் பயன்படுத்திப் பரப்பப்படும் 'பம்ப் அண்ட் டம்ப்' (செயற்கையாகப் பங்குகளை உயர்த்தி ஏமாற்றுதல்) மோசடிகள் அண்மைக் காலமாக அதிகரித்துள்ளன. இதன் காரணமாக, கடந்த இரண்டு வாரங்களில் மட்டும் 16 ஆஸ்திரேலியர்கள் தங்களது 2.7 மில்லியன் டாலருக்கும் அதிகமான பணத்தை ஒட்டுமொத்தமாக இழந்துள்ளனர்.

வாட்ஸ்அப் (WhatsApp) போன்ற குறுஞ்செய்தி செயலிகள் மற்றும் சமூக ஊடகங்கள் மூலம் வரும் முதலீட்டு ஆலோசனைகள் குறித்து ஆஸ்திரேலியர்கள் மிகவும் எச்சரிக்கையுடன் இருக்குமாறு ஆஸ்திரேலிய பிணையங்கள் மற்றும் முதலீட்டு ஆணைக்குழு (ASIC) எச்சரித்துள்ளது.

நிதித்துறையில் மதிக்கப்படும் முக்கியப் புள்ளிகள் மற்றும் பிரபலங்களின் அடையாளங்களையும் புகைப்படங்களையும் பயன்படுத்தி, மோசடி செய்பவர்கள் மக்களை வாட்ஸ்அப் போன்ற குழுக்களில் (Messaging Groups) இணைக்கின்றனர். 

பின்னர், அங்கு அவர்களுக்குப் பங்குச்சந்தை ஆலோசனைகளை வழங்கி, முதலீடு செய்யத் தூண்டுவதாக அசிக்குக்கு (ASIC) பல முறைப்பாடுகள் கிடைக்கப்பெற்றுள்ளன.

இத்தகைய மோசடிகளில் புகைப்படங்கள் தவறாகப் பயன்படுத்தப்பட்ட முக்கிய நிதித்துறை நிபுணர்களில் 'நெப்' (NAB) வங்கியின் சந்தை நுண்ணறிவுப் பிரிவின் தலைவரான டாம் பியோட்ரோவ்ஸ்கியும் (Tom Piotrowski) ஒருவர் ஆவார்.

இது குறித்து  கருத்துத் தெரிவித்த அவர், "முதலீட்டுச் சந்தைகளை மக்கள் எவ்வாறு அணுக வேண்டும் மற்றும் அதில் எப்படி ஈடுபட வேண்டும் என்பதை அவர்களுக்குக் கற்றுக்கொடுக்க நாம் இவ்வளவு காலத்தைச் செலவிடும் போது, இப்படி ஒரு விஷயம் நடப்பதைக் காண்பது நெஞ்சைப் பிளப்பதாக (heartbreaking) உள்ளது" என்று வேதனையுடன் கூறினார். 
 
இந்த 'பம்ப் அண்ட் டம்ப்' மோசடிகள் மற்ற முதலீட்டு மோசடிகளில் இருந்து முற்றிலும் மாறுபட்டவை. ஏனெனில், இவை சட்டப்பூர்வமான தரகு நிறுவனங்கள் (Brokerages) மூலம் உண்மையான பங்குச்சந்தைகளில் இருக்கும் உண்மையான பங்குகளிலேயே மக்களை முதலீடு செய்ய வைக்கின்றன.

"மற்ற முதலீட்டு மோசடிகளில் இல்லாத ஒரு கற்பனையான விஷயத்தில் பணத்தைப் போடுமாறு உங்களை ஏமாற்றுவார்கள். 

ஆனால், இந்த வகையான மோசடிகளில், உண்மையிலேயே சந்தையில் இருக்கும் ஒரு பங்கில் தான் உங்களை முதலீடு செய்ய வைக்கிறார்கள். பெரும்பாலும் இவை வெளிநாட்டுப் பங்குகளாக இருக்கும். ஆனால், மிகக் குறைந்த அளவிலேயே வர்த்தகம் செய்யப்படும் (thinly traded) பங்குகளாக இருக்கும். அதாவது, மிகச் சிலரே அவற்றை வாங்கவும் விற்கவும் செய்வார்கள்" என்று அசிகின் ஆணையாளர் ஆலன் கிர்க்லாண்ட் (Alan Kirkland) விளக்கினார்.

"மோசடி செய்பவர்கள் உங்களை முதலீடு செய்ய வைத்து, அந்தப் பங்கின் மதிப்பை செயற்கையாக மிக அதிகமாக உயர்த்துகிறார்கள் (Pump). மதிப்பு உயர்ந்தவுடன், அவர்கள் தங்களிடம் உள்ள பங்குகளை விற்றுவிட்டு (Dump) பெருமளவு லாபத்துடன் வெளியேறி விடுகிறார்கள். இதனால் அவர்கள் நிறையப் பணம் சம்பாதிக்கிறார்கள், ஆனால் மற்ற அனைவரும் தங்களது பணத்தை இழக்கிறார்கள்."

அசிகின் கூற்றுப்படி, சமீபத்திய 'பம்ப் அண்ட் டம்ப்' மோசடி ஒன்றில், ஒரு பங்கின் விலை சுமார் $15.70 டாலர் வரை உயர்ந்தது, ஆனால் மோசடி செய்பவர்கள் விற்றுவிட்டு வெளியேறிய பின்னர் அது திடீரென $1.40 டாலராக வீழ்ச்சியடைந்தது. தேசிய மோசடி தடுப்பு மையத்தின் (National Anti-Scam Centre) தரவுகளின்படி, கடந்த 2025 ஆம் ஆண்டில் ஆஸ்திரேலியர்கள் முதலீட்டு மோசடிகளால் $837.7 மில்லியன் டாலர்களை இழந்துள்ளனர்.

எவற்றில் எச்சரிக்கையாக இருக்க வேண்டும்?

ஒரு பிரபலமோ அல்லது நிதி நிபுணரோ ஒரு குறிப்பிட்ட முதலீட்டைப் பற்றி ஆன்லைனில் விளம்பரம் செய்தால், அதுவே ஒரு எச்சரிக்கை மணி என்பதைப் புரிந்துகொள்ள வேண்டும் என்று கிர்க்லாண்ட் கூறினார்.

"அதன் பிறகு, அவர்கள் உங்களை வாட்ஸ்அப் போன்ற செயலிகளில் உள்ள ஒரு தனிப்பட்ட குழுவில் அல்லது விவாத மேடையில் இணையுமாறு வற்புறுத்தினால், அது ஒரு மிகப்பெரிய ஆபத்துக்கான அறிகுறியாகும் (red flag). பொதுவாக, நீங்கள் நேரில் பார்த்திராத ஒருவரின் பரிந்துரையின் அடிப்படையில் எந்தவொரு முதலீட்டு முடிவையும் எடுப்பதில் எச்சரிக்கையாக இருக்க வேண்டும்" என்றும் அவர் குறிப்பிட்டார்.

முதலீட்டு முடிவுகளை நிதானமாக எடுக்குமாறும், அவசரமாகச் செயல்படக் கோரி வரும் அழுத்தங்களுக்குப் பணிய வேண்டாம் என்றும் அவர் அறிவுறுத்துகிறார். மேலும், உங்களுக்கு ஆலோசனை வழங்குபவரின் தகைமைகளைச் சரிபார்ப்பதும், நீங்கள் முதலீடு செய்யப் போகும் பங்கைப் பற்றி ஆராய்வதும் முக்கியமாகும்.

அரசாங்கத்தின் 'மணிஸ்மார்ட்' (Moneysmart) இணையதளமும், கட்டண விளம்பரங்கள் மூலம் வரும் முதலீட்டு வாய்ப்புகள், சமூக ஊடக செல்வாக்கு செலுத்துபவர்களின் (Influencers) திடீர் பரிந்துரைகள், எதிர்பாராமல் வரும் மின்னஞ்சல்கள் அல்லது குறுஞ்செய்திகள் மற்றும் பொது விவாத மேடைகளில் வரும் ஆலோசனைகள் குறித்து ஆஸ்திரேலியர்கள் சந்தேகத்துடன் இருக்க வேண்டும் என வலியுறுத்துகிறது.

மதிக்கத்தக்க நிதி நிபுணர்கள் யாரும் மக்களை நேரடியாக அணுகி ஒரு குறிப்பிட்ட பங்கை வாங்குமாறு வற்புறுத்த மாட்டார்கள் என்று பியோட்ரோவ்ஸ்கி கூறினார். "முதலாவதாக, இது சட்டவிரோதமானது. இரண்டாவதாக, எங்களது நற்பெயரின் அடிப்படையில் பார்த்தால், நாங்கள் ஒருபோதும் இப்படிச் செய்ய மாட்டோம். ஒரு விஷயம் நம்ப முடியாத அளவிற்கு அலாதியான லாபத்தைத் தரும் என்று கூறப்பட்டால், அதில் நிச்சயம் ஏதோ சூது இருக்கிறது என்று அர்த்தம்" என்றார்.

மேலும், ஏதேனும் நிதி ஆலோசகர் உங்களை அணுகினால், அவர்களின் ஆஸ்திரேலிய நிதிச் சேவைகள் (AFS) எண்ணைக் கேட்டுப் பெற்று, அதனை அசிகின் (ASIC) உத்தியோகபூர்வ பதிவேட்டில் சரிபார்க்குமாறு அவர் பரிந்துரைக்கிறார். ஆஸ்திரேலிய சட்டப்படி, குறிப்பிட்ட பங்குகளைப் பரிந்துரைப்பவர்கள் கண்டிப்பாக அசி அமைப்பிடம் AFS உரிமம் பெற்றிருக்க வேண்டும்.

இத்தகைய மோசடிகளால் பாதிக்கப்பட்டவர்கள் உடனடியாக அரசாங்கத்தின் 'ஸ்கேம்வாட்ச்' (Scamwatch) சேவைக்கும், தங்களது சொந்த வங்கிக்கும் தகவல் தெரிவிக்குமாறு அசி அறிவுறுத்துகிறது.

சமூக ஊடகங்களில் தவறான விளம்பரங்களை உருவாக்கி, ஒரு பங்கின் விலையைச் செயற்கையாக உயர்த்தி, பின்னர் தங்களின் பங்குகளை விற்று விலையைச் சரிப்பதே இந்த மோசடியின் பின்னணியாகும். இதனால் பாதிக்கப்பட்டவர்களிடம் இருக்கும் பங்குகளின் மதிப்பு, அவர்கள் வாங்கிய விலையில் ஒரு சிறிய பகுதியாக மட்டுமே எஞ்சியிருக்கும்.

இந்த மோசடிகள் நீண்ட காலமாகவே கவலைக்குரிய ஒன்றாக இருந்து வரும் நிலையில், செயற்கை நுண்ணறிவு (AI) தொழில்நுட்பம் இந்த மோசடிகளை இன்னும் தீவிரப்படுத்தியுள்ளதாக அசி ஆணையாளர் ஆலன் கிர்க்லாண்ட் தெரிவித்தார்.

"AI தொழில்நுட்பத்தின் மூலம், ஒரு பிரபலமோ அல்லது நிதி நிபுணரோ ஒரு பங்கை உண்மையிலேயே பரிந்துரைப்பது போன்ற போலி வீடியோக்களை (Deepfakes) உருவாக்குவது மிகவும் எளிதாகிவிட்டது.

பார்ப்பதற்கு உண்மையான நபர் பேசுவது போல இருந்தாலும், அது முற்றிலும் போலியானது" என்று அவர் எஸ்பிஎஸ் நியூஸிடம் கூறினார். மேலும், வயதான ஆஸ்திரேலியர்களிடம் பொதுவாகச் சேமிப்புப் பணம் அதிகமாக இருக்கும் என்பதால், அவர்களே இந்த மோசடிகளின் முக்கிய இலக்காகக் கொள்ளப்படுகிறார்கள் என்றும் கிர்க்லாண்ட் குறிப்பிட்டார்.