ஆஸ்திரேலியப் பிரதமர் அந்தோனி அல்பானீஸ் (Anthony Albanese), ஜப்பான் பிரதமர் சானே தாகைச்சி (Sanae Takaichi) குறித்துதான் அநாகரிகமான முறையில் எந்தக் கருத்தும் தெரிவிக்கவில்லை என மறுத்துள்ளார்.
முன்னர் ஒளிபரப்பான இணைய ஒலிபரப்பு (Podcast) வீடியோ ஒன்று மீண்டும் இணையத்தில் வைரலானதைத் தொடர்ந்து இந்த சர்ச்சை வெடித்துள்ளது.
அந்த வீடியோவில், வெளிநாட்டுப் பயணங்களின் போது தமக்குக் கிடைத்த மிக "மோசமான பரிசு" எது என்று அல்பானீஸிடம் கேட்கப்பட்டது.
அதற்குப் பதிலளித்த அவர், சமீபத்தில் ஆஸ்திரேலியாவிற்கு வருகை தந்திருந்த ஜப்பான் பிரதமர் சானே தாகைச்சி தமக்கு ஒரு 'ராயல் மெலன்' (Royal Melon - தர்பூசணி போன்ற ஒரு வகை பழம்) பரிசளித்ததாகக் கூறினார்.
அந்தப் பரிசு "சற்று விசித்திரமாக இருந்தாலும், சுவையாக இருந்தது" என்று கூறிய அல்பானீஸிடம், தாகைச்சி அந்தப் பழங்களை எப்படி ஆஸ்திரேலியாவிற்குள் கொண்டுவந்தார் எனத் தொகுப்பாளர் கேட்டார்.
அதற்குப் பதிலளித்த அவர், "எனக்குத் தெரியாது, ஆனால் அவர் இரண்டு மெலன்களைக் கொண்டுவந்தார்..." எனக் கூறித் தன் நெஞ்சிற்கு நேரே இரு கைகளையும் நீட்டிச் சைகை செய்தார்.
அதைத் தொடர்ந்து, நிகழ்ச்சியின் தொகுப்பாளர் நிக்கி ஆஸ்போர்ன், ஜப்பான் பிரதமரின் உடலமைப்பைக் கேலி செய்யும் வகையில் பேசினார். ஆனால், அல்பானீஸ் அதைத் தடுக்கவோ அல்லது கண்டிக்கவோ இல்லை.
கடந்த ஜூலை மாதம் ஒளிபரப்பான இதே நிகழ்ச்சியில்தான், பிரபல பாடகி கைலி மினோக் குறித்து அல்பானீஸ் பேசிய கருத்து பெரும் சர்ச்சையைக் கிளப்பியது. பின்னர் அதற்கு அல்பானீஸ் பகிரங்கமாக மன்னிப்பும் கோரியிருந்தார்.
தற்போது, ஆஸ்திரேலியாவுக்கான முன்னாள் ஜப்பானிய தூதர் ஷிங்கோ யமகாமி (Shingo Yamagami) எழுதியுள்ள சிறப்புக் கட்டுரையில், பிரதமர் அல்பானீஸின் இந்த பேச்சை "பாலின ரீதியான கேலி" (Sexist) என்றும், "நன்றியற்ற செயல்" என்றும் விமர்சித்துள்ளார்.
"எவ்வளவு நகைச்சுவையாகச் சொல்லப்பட்டிருந்தாலும், ஆஸ்திரேலியாவுடனான நட்புறவை பெரிதும் மதிக்கும் ஜப்பானிய மக்களால் இந்த ஜோக் என்றென்றும் நினைவுகூரப்படும்," என்று அவர் குறிப்பிட்டுள்ளார்.
மேலும், கடந்த அக்டோபரில் ஜப்பானின் முதல் பெண் பிரதமராகப் பொறுப்பேற்ற தாகைச்சி, ஏற்கனவே இதுபோன்ற பல உடல் சார்ந்த கேலிகளைச் சந்தித்து வருவதையும் அவர் சுட்டிக்காட்டினார்.
இதனைப் பிடித்துக்கொண்ட ஆஸ்திரேலிய எதிர்க்கட்சித் தலைவர் அங்கஸ் கெய்லர் (Angus Taylor), பிரதமர் அல்பானீஸ் ஜப்பான் பிரதமரிடம் நேரில் மன்னிப்பு கேட்க வேண்டும் என வலியுறுத்தியுள்ளார்.
இருப்பினும், தங்களின் பேச்சில் எந்தவித இரட்டை அர்த்தமும் அல்லது உள்நோக்கமும் இல்லை என அல்பானீஸின் அலுவலகம் வெளியிட்டுள்ள அறிக்கையில் திட்டவட்டமாக மறுத்துள்ளது.
