கருத்துக்கணிப்புகளில் செல்வாக்கு பெற்று வரும் ஆஸ்திரேலியாவின் தீவிர வலதுசாரி 'வன் நேஷன்' (One Nation) கட்சி, குடிமக்களின் எதிர்கால ஓய்வூதியப் பங்களிப்பில் ஒரு பகுதியை அவர்களின் தற்போதைய கைச் சம்பளமாக (Take-home pay) வழங்குவதற்கான முன்மொழிவை திங்கள்கிழமை வெளியிட்டது.
இருப்பினும், ஆளும் மத்திய-இடதுசாரி தொழிற்கட்சி (Labor Party) இத்திட்டத்திற்குக் கடும் கண்டனம் தெரிவித்துள்ளது.
வாடகை அல்லது வீட்டுக்கடன் (Mortgage) செலுத்துபவர்கள், தங்களின் கட்டாய ஓய்வூதியப் பங்களிப்பில் (Pension contribution) நான்கில் ஒரு பங்கை, அதிகபட்சமாக மூன்று ஆண்டுகளுக்குத் தங்களின் சம்பளக் கணக்கில் நேரடியாகப் பெற்றுக்கொள்ள விருப்பத்தின் அடிப்படையில் அனுமதிக்கப்பட வேண்டும் என வன் நேஷன் கட்சியின் தலைவர் பாலின் ஹன்சன் (Pauline Hanson) தெரிவித்துள்ளார்.
மேலும், இந்த கூடுதல் தொகைக்குக் தனிநபர் வருமான வரி விகிதத்திற்குப் பதிலாகக் சலுகை வரி விகிதமே விதிக்கப்படும் என்றும் அவர் கூறியுள்ளார்.
"மக்களுக்குச் சற்றே மூச்சுவிடும் இடைவெளியை வழங்க ஒன் நேஷன் விரும்புகிறது. தேவைக் காலத்தில் உங்கள் சொந்தப் பணம் உங்கள் கைக்கே அதிகளவில் கிடைக்கும்" என பாலின் ஹன்சன் தனது அறிக்கையில் குறிப்பிட்டுள்ளார்.
இத்திட்டத்தின் மூலம், ஆண்டிற்கு சுமார் 90,500 ஆஸ்திரேலிய டொலர்களை ஈட்டும் முழுநேர ஊழியர் ஒருவர், வரிக் கழிவுகளுக்குப் பிறகு ஆண்டிற்கு சுமார் 2,300 டொலர்களைக் கூடுதலாகப் பெறுவார் என ஹன்சன் கணக்கிட்டுக் கூறியுள்ளார்.
அதேநேரம், முதலாளிகளின் 12% கட்டாய ஓய்வூதியப் பங்களிப்புத் தொடர்ந்து வழங்கப்படும் என்றும் தெரிவிக்கப்பட்டுள்ளது.
1997-ஆம் ஆண்டு தொடங்கப்பட்ட வன் நேஷன் கட்சி, நீண்டகாலமாக ஒரு தீவிரவாத முனையிலிருந்த சிறு கட்சியாகவே பார்க்கப்பட்டது. ஆனால், குடிவரவு (Immigration) குறித்த பாலின் ஹன்சனின் கடுமையான நிலைப்பாடுகள் காரணமாக, சமீபத்திய கருத்துக்கணிப்புகளில் அக்கட்சிக்கு மக்கள் ஆதரவு கணிசமாக அதிகரித்துள்ளது.
ஆகஸ்ட் 30 அன்று வெளியான 'நியூஸ்போல்' (Newspoll) கருத்துக்கணிப்பின்படி, ஒன் நேஷன் கட்சியின் வாக்கு வங்கி 30 சதவீதமாக உயர்ந்துள்ளது. இது ஆளும் தொழிற்கட்சியின் 29 சதவீத ஆதரவையும், எதிர்க்கட்சியான லிபரல்-நேஷனல் கூட்டணியின் 19 சதவீத ஆதரவையும் விட அதிகமாகும்.
அதிகரித்து வரும் எரிபொருள் விலையால் ஏற்பட்ட வாழ்க்கைச் செலவு உயர்வே வாக்காளர்களின் முதன்மை கவலையாக உள்ளது.
அதேவேளையில், ஒன் நேஷன் கட்சியின் இந்த அறிவிப்பை விமர்சித்துள்ள நிதியமைச்சர் ஜிம் சால்மர்ஸ் (Jim Chalmers), இது தொழிலாளர்களின் ஓய்வூதியச் சேமிப்பின் மீதான "நேரடித் தாக்குதல்" எனச் சாடியுள்ளார்.
சுமார் 4.5 டிரில்லியன் ஆஸ்திரேலிய டொலர்கள் மதிப்புக்கொண்ட நாட்டின் ஓய்வூதியத் துறையின் எதிர்காலத்தைத் தீர்மானிக்கும் வாக்கெடுப்பாகவே 2028-இல் வரவிருக்கும் அடுத்த பொதுத் தேர்தல் அமையும் என்றும் அவர் குறிப்பிட்டார்.
"தொழிலாளர்களின் ஓய்வூதியக் காலத்தில் பல்லாயிரக்கணக்கான டொலர்களை இழக்கச் செய்யும் ஒரு தவறான அணுகுமுறையே இதுவாகும். தற்காலிக நன்மையை விட, கூட்டு வட்டி மூலமாக எதிர்காலத்தில் கிடைக்கும் கூட்டு இழப்பே அதிகமாக இருக்கும்" என்றும் நிதியமைச்சர் எச்சரித்துள்ளார்.
