மெல்போர்னின் பிரபல நார்த்லேண்ட் வர்த்தக மையத்தில் (Northland Shopping Centre) இடம்பெற்ற மோதல் சம்பவத்தையடுத்து, நான்கு சிறுமிகள் மற்றும் 18 வயதுடைய பெண் ஒருவர் கைது செய்யப்பட்டுள்ளனர். 

அந்த வர்த்தக மைய வளாகத்தில் இடம்பெற்ற தொடர்ச்சியான அசம்பாவிதங்களின் வரிசையில் இது அண்மைய சம்பவமாக பதிவாகியுள்ளது.

வெள்ளிக்கிழமை இரவு பிரஸ்டனில் உள்ள குறித்த வர்த்தக மையத்தின் உணவகப் பகுதியில் (Food court) ரோந்து பணியில் ஈடுபட்டிருந்த பொலிஸார், பெண்களின் குழுவொன்று மோதிக்கொள்வதைக் கண்டு தலையிட்டதாக விக்டோரியா பொலிஸார் உறுதிப்படுத்தியுள்ளனர்.

இதனைத் தொடர்ந்து 12, 14, 16, 17 வயதுடைய நான்கு சிறுமிகள் மற்றும் 18 வயதுடைய பெண் ஒருவர் பொலிஸாரால் கைது செய்யப்பட்டனர்.

இச்சம்பவத்தில் 14 வயதுச் சிறுமி சிறு காயங்களுக்கு உள்ளாகி வைத்தியசாலையில் அனுமதிக்கப்பட்டார். 

12 வயதுச் சிறுமியும் சிறு காயங்களுக்கு உள்ளானதுடன், அவருக்கு அவசர ஆம்புலன்ஸ் மருத்துவக் குழுவினரால் சிகிச்சை அளிக்கப்பட்டது. அவர் மேலதிக விசாரணைகளுக்கு உட்படுத்தப்பட்டு பின்னர் விடுவிக்கப்பட்டார்.

கோபர்க் நோர்த் பகுதியைச் சேர்ந்த 18 வயதுடைய பெண், 16 மற்றும் 17 வயதுடைய சிறுமிகளுடன் பொலிஸாரால் விசாரணைக்கு உட்படுத்தப்பட்டதுடன், நீதிமன்ற அழைப்பாணை (summons) மூலம் அவர்கள் மீது குற்றச்சாட்டுகள் சுமத்தப்படும் என எதிர்பார்க்கப்படுகிறது.

இம்மோதலின் போது பயன்படுத்தப்பட்டதாகக் கூறப்படும் கத்தி ஒன்றை ‘ஒப்பரேஷன் பல்ஸ்’ (Operation Pulse) பொலிஸ் அதிகாரிகள் பறிமுதல் செய்துள்ளதாக விக்டோரியா பொலிஸார் தெரிவித்தனர்.

பான்யூல் குற்றப் புலனாய்வுப் பிரிவின் (Banyule Crime Investigation Unit) துப்பறிவாளர்கள் இச்சம்பவம் தொடர்பான பின்னணி சூழ்நிலைகள் குறித்து விசாரணை நடத்துவார்கள் என பொலிஸ் பேச்சாளர் ஒருவர் தெரிவித்தார்.

வெள்ளிக்கிழமை இடம்பெற்ற இந்த மோதலானது, அண்மைய ஆண்டுகளில் மெல்போர்ன் வர்த்தக மையங்களில் இடம்பெற்ற தொடர்ச்சியான வன்முறைச் சம்பவங்களின் தொடர்ச்சியாகும்.

முன்னதாக, மே 2025 இல் இடம்பெற்ற பெரும் பரபரப்பை ஏற்படுத்திய சம்பவமொன்றில், உணவகப் பகுதியில் 10 பேருக்கு இடையே வீச்சருவாள்களுடன் (machetes) மோதல் வெடித்ததை அடுத்து ஏராளமான மக்கள் நார்த்லேண்ட் வர்த்தக மையத்தை விட்டு அலறியடித்து ஓடினர்.

அக்காலகட்டத்தில், இரண்டு எதிரெதிர் குழுக்களுக்கு இடையே "பழிவாங்கும்" நோக்கில் இடம்பெற்ற இந்தத் தாக்குதலில் நபர் ஒருவர் பலத்த காயமடைந்ததாக பொலிஸார் நம்பினர்.

மற்றொரு சம்பவமாக, ஜூன் 2025 இல் விளையாட்டு பயன்பாட்டு வாகனம் (SUV) ஒன்று நார்த்லேண்ட் வர்த்தக மையத்தினுள் அதிவேகமாக இயக்கப்பட்டது ஸ்மார்ட்போன் கேமராவில் பதிவு செய்யப்பட்டிருந்தது.

குற்றவியல் புள்ளியியல் முகவர் அமைப்பின் (CSA) தரவுகளின்படி, 2024-25 நிதியாண்டில் மெல்போர்னின் 13 முக்கிய வர்த்தக மையங்களில் 5,901 குற்றச் சம்பவங்கள் பதிவாகியுள்ளன. இது முந்தைய ஆண்டை விட 20 சதவீதம் அதிகரிப்பாகும்.

ஆய்வுக்கு உட்படுத்தப்பட்ட காலத்தில் பேசைட் ஃபிராங்க்ஸ்டன் (Bayside Frankston) அதிக எண்ணிக்கையிலான குற்றச் சம்பவங்களைப் பதிவு செய்து முதலிடத்திலும், நார்த்லேண்ட் இரண்டாம் இடத்திலும், வெஸ்ட்ஃபீல்ட் ஃபவுண்டன் கேட் (Westfield Fountain Gate) மூன்றாம் இடத்திலும் உள்ளன.