நியூ சவுத் வேல்ஸ் (NSW) மாநிலத்தில் 10 மணி நேரத்திற்குள் குடும்ப வன்முறை தொடர்பான மூன்று வெவ்வேறு சம்பவங்களில் மூன்று பெண்கள் கொடூரமாகக் கொல்லப்பட்டதைத் தொடர்ந்து,  மாநில பிரீமியர் கிறிஸ் மின்ஸ்  கவலை தெரிவித்துள்ளார்.

கடந்த சனிக்கிழமை வாகா வாகா (Wagga Wagga), பாண்டி கடற்கரை (Bondi Beach) மற்றும் மோல் ரிவர் (Mole River) ஆகிய இடங்களில் நடந்த சம்பவங்களில் 23, 70 மற்றும் 90 வயதுடைய மூன்று பெண்கள் உயிரிழந்தனர்.
  
சனிக்கிழமை முற்பகல் 11.45 மணியளவில், வாகா வாகாவின் கூரிங்கல் பகுதியில் அமைந்துள்ள வீட்டில் 23 வயது பெண் ஒருவர் கத்தியால் குத்தப்பட்டதாகத் தகவல் கிடைத்தது. அவசர மருத்துவக் குழுவினர் தீவிர சிகிச்சை அளித்தபோதிலும், அவர் சம்பவ இடத்திலேயே உயிரிழந்தார்.

ஆரம்பத்தில் அப்பகுதியில் கைது செய்யப்பட்ட 18 வயது இளைஞர் ஒருவர், பின்னர் எந்தக் குற்றச்சாட்டும் இன்றி விடுவிக்கப்பட்டார். அவசரப் படையினர் வருவதற்கு முன்பே மற்றொரு நபர் வீட்டிலிருந்து வெளியேறியதாகக் காவல்துறைக்குத் தெரிவிக்கப்பட்டது.

தொடர் விசாரணையை அடுத்து, அதே பகுதியில் உள்ள ஒரு வீட்டில் 31 வயது நபர் கைது செய்யப்பட்டார். கொல்லப்பட்ட பெண்ணுடன் இவர் குடும்ப உறவில் இருந்ததாகக் காவல்துறையினர் தெரிவிக்கின்றனர். இவர் மீது குடும்ப வன்முறை சார்ந்த கொலை வழக்குப் பதிவு செய்யப்பட்டு, பிணை மறுக்கப்பட்டுள்ளது.

இரண்டாவது சம்பவம்: பாண்டி கடற்கரை

வாகா வாகா சம்பவத்திற்கு சுமார் ஐந்து மணி நேரத்திற்குப் பிறகு, மாலை 5.15 மணியளவில் பாண்டி பீச்சில் உள்ள அடுக்குமாடி குடியிருப்பில் 90 வயது மூதாட்டி ஒருவர் கத்திக் காயங்களுடன் உயிருக்குப் போராடிக் கொண்டிருப்பது கண்டறியப்பட்டது. மருத்துவக் குழுவின் முயற்சிகள் பலனின்றி அவரும் சம்பவ இடத்திலேயே உயிரிழந்தார்.

அந்த மூதாட்டியின் பேரன் எனக் கருதப்படும் 47 வயது நபர் சம்பவ இடத்திலேயே கைது செய்யப்பட்டு, கொலை வழக்குப் பதிவு செய்யப்பட்டது. அவருக்குப் பிணை மறுக்கப்பட்டு நீதிமன்றத்தில் ஆஜர்படுத்தப்பட்டார்.

மூன்றாவது சம்பவம்: மோல் ரிவர்

இரவு 9.35 மணியளவில், டென்டர்ஃபீல்ட் பகுதிக்கு மேற்கே உள்ள மோல் ரிவர் பகுதியில், தீயினால் பகுதியளவு சேதமடைந்த வீட்டிற்குள் 70 வயது பெண் இறந்து கிடந்தது கண்டறியப்பட்டது.

முன்னதாக, அருகில் உள்ள வீடொன்றில் நடந்த குடும்ப வன்முறை குறித்த புகாரின் பேரில் காவல்துறையினர் அங்கு சென்றனர். அப்போது 37 வயது நபர் ஒருவர், 74 வயதுடைய வீட்டு உரிமையாளரைத் தாக்கிவிட்டு வாகனத்தைத் திருட முயன்றது தெரியவந்தது.

அந்த நபரை உடனடியாகக் கைது செய்த அதிகாரிகள், அடுத்துள்ள வீட்டிற்குச் சென்று சோதனையிட்டபோதே மூதாட்டியின் சடலத்தைக் கண்டறிந்தனர். கைது செய்யப்பட்ட நபரும், இறந்துபோன மூதாட்டியும் ஒருவரையொருவர் அறிந்தவர்கள் என்றும், அவர் மீதும் கொலை வழக்குப் பதிவு செய்யப்பட்டு நீதிமன்றக் காவலில் வைக்கப்பட்டுள்ளார் என்றும் தெரிவிக்கப்பட்டுள்ளது.

அரசியல் தலைவர்களின் கண்டனம்

இந்த மூன்று சம்பவங்களையும் "அதிர்ச்சியளிப்பவை" என்று வர்ணித்துள்ள முதல்வர் கிறிஸ் மின்ஸ், "ஒரே நாளில் மூன்று பெண்கள் தங்கள் உயிரை இழந்துள்ளனர். கற்பனை செய்ய முடியாத துயரத்தில் இருக்கும் குடும்பத்தினருக்கு எனது ஆழ்ந்த இரங்கலைத் தெரிவித்துக் கொள்கிறேன்" என்று கூறியுள்ளார்.

அதேபோல, எதிர்க்கட்சித் தலைவர் கெல்லி ஸ்லோன் கூறுகையில், "இந்தச் சம்பவங்கள் தனித்து நடப்பவை அல்ல. ஆஸ்திரேலிய சுகாதார மற்றும் நலவாழ்வு நிறுவனத்தின் தரவுகளின்படி, 2024-25 காலக்கட்டத்தில் சராசரியாக 11 நாட்களுக்கு ஒரு பெண் தனது துணையால் கொல்லப்பட்டுள்ளார். 

23 வயது இளம் பெண் முதல் 90 வயது மூதாட்டி வரை பெண்கள் இன்னும் தங்கள் சொந்த வீடுகளிலேயே பாதுகாப்பாக இல்லை. இந்த விவகாரங்களில் அனைத்து அரசு அமைப்புகளும் உடனடியாக நடவடிக்கை எடுக்க வேண்டிய பொறுப்பு உள்ளது" என்று வலியுறுத்தினார்.