உலகளவில் பேரழிவை ஏற்படுத்தக்கூடிய சூப்பர் எல் நினோ (El Niño) காலநிலை மாற்றத்தால் வரும் மாதங்களில் ஆஸ்திரேலியாவில் நூற்றுக்கணக்கான வெப்ப அலை மரணங்கள் நிகழக்கூடும் என எதிர்பார்க்கப்படுகிறது.
வரலாறு காணாத இந்த தீவிர காலநிலை நிகழ்வு காரணமாக, வழக்கமான வெப்பநிலையை விட 1.2 டிகிரி செல்சியஸ் வெப்பநிலை அதிகரிக்கும் என்பதால், இம்மாதம் முதல் அடுத்த ஆண்டு பெப்ரவரி வரையிலான காலப்பகுதியில் ஆஸ்திரேலியாவில் 260 கூடுதல் வெப்ப அலை மரணங்கள் பதிவாகும் என 'கிளைமேட் இம்பாக்ட் லேப்' (Climate Impact Lab) விஞ்ஞானிகள் கணித்துள்ளனர்.
இதில் பாதியளவு மரணங்கள் நியூ சவுத் வேல்ஸ் (NSW) மாநிலத்தில் நிகழக்கூடும் என்றும் எச்சரிக்கப்பட்டுள்ளது.
செவ்வாய்க்கிழமை வெளியிடப்பட்ட அறிக்கை ஒன்றில், இந்த சூப்பர்எல் நினோ காலநிலை மாற்றத்தால் எதிர்காலத்தில் ஏற்படவிருக்கும் பேராபத்தின் ஒரு கொடூரமான முன்னோட்டம் என விஞ்ஞானிகள் எச்சரித்துள்ளனர்.
"இந்த அசாதாரண வெப்பமான சூழல், இன்னும் 20 ஆண்டுகளில் காலநிலை மாற்றத்தால் நாம் சந்திக்கவிருக்கும் உயர் வெப்பநிலையை ஒத்திருக்கும். மேலும் சாதாரண ஆண்டில் எதிர்பார்க்கப்படுவதை விட 44 சதவீதம் கூடுதல் தீவிர வெப்ப நாட்களை இது உருவாக்கும்."
"நாம் நம்மைத் தற்காத்துக் கொள்ளவும், இந்தச் சூழலுக்குப் பழகிக் கொள்ளவும் போதிய அவகாசம் கிடைக்கும் முன்னரே, இன்னும் இரு தசாப்தங்களுக்குப் பிறகு வரவிருக்கும் கடுமையான வெப்பநிலையை இப்போதே நமக்கு எதிர்கொள்ள வைத்து, எல் நினோ நம்மை எதிர்காலத்தை நோக்கித் தள்ளுகிறது" என்றும் அவ்வறிக்கையில் தெரிவிக்கப்பட்டுள்ளது.
இவ்வறிக்கையின் ஆசிரியர்களான மைக்கேல் கிரீன்ஸ்டோன், தம்மா கார்லேட்டன், ஜெனிவீவ் மெரிக்கிள் மற்றும் எமிலி குரோவர்-கோபெக் ஆகியோர் கணித்துள்ளபடி, இந்த நிகழ்வின் முதல் ஒன்பது மாதங்களில் (கடந்த ஜூன் முதல் அடுத்த ஆண்டு பிப்ரவரி வரை) உலகம் முழுவதும் கூடுதலாக 4,51,000 பேர் உயிரிழப்பார்கள் என எதிர்பார்க்கப்படுகிறது.
சமீபத்தில் நேபாளத்தில் ஏற்பட்ட திடீர் வெள்ளப்பெருக்கில் உயிரிழந்த அல்லது காணாமல் போனதாகக் கருதப்படும் 6,800 பேருடன் ஒப்பிடுகையில், இந்த எண்ணிக்கை சுமார் 65 மடங்கு அதிகமாகும் என அவர்கள் சுட்டிக்காட்டியுள்ளனர்.
இந்த உயிரிழப்புகளில் பணக்கார நாடுகளின் பங்களிப்பு மிகக் குறைவாகவே உள்ளதுடன், கடுமையாகப் பாதிக்கப்படும் முதல் 50 நாடுகளின் பட்டியலில் ஆஸ்திரேலியா இடம்பெறவில்லை.
"வருமான நிலைகளுக்கும், வெப்பநிலை தொடர்பான இறப்பு விகிதங்களுக்கும் இடையே குறிப்பிடத்தக்க இடைவெளி இருப்பதை எங்கள் ஆராய்ச்சி காட்டுகிறது" என எமிலி குரோவர்-கோபெக் தெரிவித்துள்ளார்.
"ஒரே மாதிரியான தட்பவெப்பநிலை கொண்ட பகுதிகளாக இருந்தாலும், வெப்ப பாதிப்புகளைத் தாங்கும் மற்றும் தணிக்கும் திறனில் உள்ள வேறுபாடுகள் காரணமாக அங்கு மாறுபட்ட இறப்பு விகிதங்களே பதிவாகின்றன. இதனால், ஒரே அளவிலான வெப்பநிலையை எதிர்கொள்ளும்போது பணக்கார நாடுகளை விட ஏழை பிராந்தியங்களிலேயே அதிகளவிலான வெப்ப அலை மரணங்கள் சம்பவிக்கின்றன."
இந்த பேரழிவின் மிக மோசமான தாக்கம் ஆப்பிரிக்காவின் சாஹேல் (Sahel) பிராந்தியத்தைத் தாக்கும் எனக் கருதப்படுகிறது. அங்கு இம்மாதம் முதல் பிப்ரவரி வரை நைஜீரியாவில் மட்டும் 31,400 பேர் உயிரிழப்பார்கள் என எதிர்பார்க்கப்படுகிறது.
அதேபோன்று இந்தோனேசியா (19,300), சூடான் (17,500), இந்தியா (15,800) மற்றும் பிரேசில் (13,300) ஆகிய நாடுகளிலும் பேரழிவை ஏற்படுத்தும் வகையிலான இறப்பு எண்கள் கணிக்கப்பட்டுள்ளன. வட அரைக்கோளத்தில் கோடைகாலம் தொடங்கும் போது இந்தத் தாக்கம் மேலும் வட பகுதியை நோக்கி நகரும்.
ஆஸ்திரேலியாவில், நியூ சவுத் வேல்ஸ் மாநிலம் (120) அதிகளவில் பாதிக்கப்படும் என எதிர்பார்க்கப்படுகிறது. அதைத் தொடர்ந்து மேற்கு ஆஸ்திரேலியா (72), குயின்ஸ்லாந்து (61), விக்டோரியா (13) மற்றும் தெற்கு ஆஸ்திரேலியா (12) ஆகிய மாநிலங்கள் பாதிக்கப்படக்கூடும்.
"இந்த எல் நினோ காலத்தில் உலகின் பெரும்பாலான பகுதிகள் சந்திக்கும் இந்த அசாதாரண வெப்பநிலையானது 'எதிர்காலத்திலிருந்து வந்த அஞ்சல் அட்டை' போன்றது. தற்போது இவை அசாதாரணமாகத் தெரிந்தாலும், இன்னும் சில தசாப்தங்களில் இதுவே இயல்பான ஒன்றாக மாறிவிடும். தற்காப்பு நடவடிக்கைகளுக்கான புதிய முதலீடுகள் செய்யப்படாவிட்டால் நாம் எங்கு போய் முடிவோம் என்பதற்கான எச்சரிக்கைச் சான்றாகவே இந்த உடனடி இறப்புக் கணிப்புகள் அமைகின்றன" என ஆராய்ச்சியாளர்கள் குறிப்பிட்டுள்ளனர்.
"ஆனால் காலநிலை மாற்றத்தைப் பொறுத்தவரையில், உயிர்களைக் காப்பாற்றுவதற்கான தற்காப்பு நடவடிக்கைகளை மேற்கொள்வதற்கு இன்னும் அவகாசம் உள்ளது என்பதே இதிலுள்ள வேறுபாடாகும்."
பாதிக்கப்படும் பகுதிகளுக்கு அவசர உதவிகளை விரைவுபடுத்துமாறும், வெப்ப அலை எச்சரிக்கைகள், விளிம்புநிலை மக்களுக்கான சுகாதார சேவைகள், குளிர்விக்கும் மையங்கள் மற்றும் குடிநீர் விநியோக நிலையங்களை அமைப்பதே மரணங்களைக் குறைப்பதற்கான சிறந்த வழிமுறைகள் என்றும் அவ்வறிக்கை வலியுறுத்துகிறது.
அத்துடன், கடுமையாகப் பாதிக்கப்படும் நாடுகள் தொழிலாளர் பாதுகாப்பு நடவடிக்கைகளை அதிகரிக்க வேண்டும் என்றும், சுகாதார அமைப்புகளின் கொள்ளளவை உயர்த்த வேண்டும் என்றும் கேட்டுக்கொள்ளப்பட்டுள்ளன.
வெள்ளம், தீ விபத்து போன்ற இயற்கை சீற்றங்களால் ஏற்படும் மரணங்களைத் தவிர்த்து, கடந்த 20 ஆண்டுகளில் குறிப்பிட்ட மாதத்தின் சராசரி இறப்பு விகிதத்துடன் ஒப்பிட்டே இந்த கூடுதல் வெப்ப அலை மரணங்கள் கணக்கிடப்பட்டுள்ளன.
"வரும் மாதங்களில் பல்லாயிரக்கணக்கான உயிர்களைக் காப்பாற்றுவதற்கு உடனடியாக எங்கு அவசர நடவடிக்கைகளை எடுக்க முடியும் என்பதை கொள்கை வகுப்பாளர்கள் துல்லியமாக அறிந்துகொள்ள இந்த அறிக்கை வழிவகுக்கிறது" என 'கிளைமேட் இம்பாக்ட் லேப்' அமைப்பின் இணை நிறுவனரும் சிகாகோ பல்கலைக்கழகப் பொருளாதார நிபுணருமான மைக்கேல் கிரீன்ஸ்டோன் தெரிவித்துள்ளார்.
