ஆஸ்திரேலியக் காட்டுப் பகுதியின் அமைதியைக் கிழித்துக் கொண்டு துப்பாக்கிகள் இயங்கும் சத்தம் கேட்கிறது. அதைத் தொடர்ந்து ஏவுகணைகள் தாக்குகின்றன, தொலைவில் புகைப் மண்டலம் எழுகிறது.
ட்ரோன்களின் இரைச்சல் தொடங்குகிறது; சிறிது நேரத்தில் மேலே பறக்கும் ஹெலிகாப்டர்களின் சத்தத்தில் அது மூழ்கிப்போகிறது. எந்தவொரு செலவையும் பொருட்படுத்தாமல் அனைத்து வகையான ராணுவ உபகரணங்களும் அங்கு பயன்படுத்தப்படுகின்றன.
ஆனால் இது போர்க்களம் அல்ல. டவுன்ஸ்வில் (Townsville) பகுதி இரண்டாம் உலகப் போருக்குப் பிறகு இதுபோன்ற போரைக் கண்டதில்லை. இது ஆஸ்திரேலியாவின் ராணுவப் பலத்தைக் காட்டும் பயிற்சியாகும்.
"நாம் ஒரு கொந்தளிப்பான உலகில் வாழ்கிறோம்" என்கிறார் ஆஸ்திரேலிய ராணுவத்தின் பிரிகேடியர் பென் மெக்லெனன் (Ben McLennan).
எதிரி யார் என்று கேட்கப்பட்டபோது, "நாம் ஒரு போருக்குப் பயிற்சி பெறுகிறோம் - இரண்டாம் உலகப் போர், முதல் உலகப் போர் போன்ற மிக மோசமான, ஒரு முழுமையான போருக்குப் பயிற்சி எடுக்கிறோம்" என்று நேரடிப் பதிலைத் தவிர்த்து அவர் கூறினார்.
அமெரிக்காவுடன் பிணைப்பை வலுப்படுத்துதல்
"எங்களை அமெரிக்காவின் '911' அவசரக்காலப் படைகளாகக் கூறிக்கொள்ளவே விரும்புகிறோம்" என்கிறார் அமெரிக்க கடற்படை வீரர் (US Marine) கெவின் ஹிக்ஸ்.
எண்ணிக்கை அடிப்படையில் அவர்கள் முன்னெப்போதையும் விடத் தயாராக உள்ளனர். 2012-ஆம் ஆண்டில், ஆண்டுதோறும் நடைபெறும் ஆறு மாதப் பயிற்சிக்காக வெறும் 200 அமெரிக்க கடற்படை வீரர்களே ஆஸ்திரேலியாவிற்கு அனுப்பப்பட்டனர். இன்று அந்த எண்ணிக்கை சுமார் 2,500 ஆக உயர்ந்துள்ளது.
ஆஸ்திரேலியாவின் 2026 தேசிய பாதுகாப்பு உத்தியைப் படித்தால், இந்த எண்ணிக்கை ஏன் உயர்ந்து வருகிறது என்பதை எளிதாகப் புரிந்துகொள்ள முடியும்.
அமெரிக்க அரசு மீது ஆஸ்திரேலிய அரசு வைத்துள்ள நம்பிக்கையின் அளவைக் கருத்தில் கொள்ளும்போது இவை மிகவும் குறிப்பிடத்தக்க முடிவுகளாகும்.
சீனாவடனான வர்த்தக உறவும் சவால்களும்
அந்தோணி அல்பானீஸியின் தொழிலாளர் கட்சி (Labor) ஆட்சியின் கீழ் சமீபத்திய ஆண்டுகளில் இரு நாடுகளுக்கும் இடையிலான உறவு மேம்பட்டுள்ளபோதிலும், சவால்கள் இல்லாமல் இல்லை. உதாரணமாக, இந்த ஆண்டு ஜூன் மாதம், சுதந்திர வர்த்தக ஒப்பந்தம் இருந்தபோதிலும், சீனா தனது உள்நாட்டுச் சந்தையைப் பாதுகாப்பதற்காக ஆஸ்திரேலிய மாட்டு இறைச்சி மீது 55% வரியைச் விதித்தது.
இருப்பினும், ஆஸ்திரேலியாவின் மிகப்பெரிய ஏற்றுமதிச் சந்தையாக சீனாவே திகழ்கிறது.
இத்தகைய சிக்கல்கள் இருந்தபோதிலும், ஆஸ்திரேலியர்களில் பெரும்பாலானோர் (61%) சீனாவை ஒரு பாதுகாப்பு அச்சுறுத்தலாகப் பார்ப்பதை விட, ஒரு பொருளாதாரப் பங்காளியாகவே பார்க்கிறார்கள் என்று லோவி இன்ஸ்டிடியூட் (Lowy Institute) நடத்திய கருத்துக்கணிப்பு தெரிவிக்கிறது. இது கடந்த ஆண்டை விட 11 சதவீதம் அதிகமாகும்.
மேலும், வரலாற்றிலேயே முதன்முறையாக, பெரும்பாலான ஆஸ்திரேலியர்கள் (51%) அமெரிக்காவுடனான உறவை விட சீனாவுடனான உறவே ஆஸ்திரேலியாவிற்கு மிகவும் முக்கியமானது என்று நம்புவதாக அந்த ஆய்வில் தெரியவந்துள்ளது.
வல்லரசுகளின் எழுச்சியும் வீழ்ச்சியும்
அமெரிக்கா மிகக் கடுமையான மாற்றங்களைச் செய்து வரும் சூழலில், "நாம் முழுமையாக நம்பிப் பொறுப்புகளை ஒப்படைக்கக்கூடிய ஒரு பெரிய அண்ணனாக அமெரிக்கா உள்ளதா?" என்ற கேள்வி ஆஸ்திரேலியாவிலும் உலகளவிலும் பலருக்கு எழுந்துள்ளது.
ஆஸ்திரேலியா இரு வல்லரசுகளுக்கு இடையே சிக்கியிருக்கும் நிலையில், தலைவர்களுக்கு இடையிலான ஒவ்வொரு சந்திப்பும் மிகுந்த முக்கியத்துவம் பெறுகிறது.
"இது இரு பெரும் வல்லரசுகளுக்கு இடையிலான அதிகாரப் போட்டியாகும்" என்று ஆய்வாளர்கள் கூறுகின்றனர். அந்தப் போட்டியில் ஆஸ்திரேலியா தவிர்க்க முடியாமல் பாதிக்கப்படுகிறது.
அமெரிக்கா ஆஸ்திரேலியாவின் முக்கிய பாதுகாப்பு கூட்டாளியாக உள்ளது. அதேவேளையில், பொருளாதார ரீதியாகச் சீனாவும் ஆஸ்திரேலியாவிற்கு இன்றியமையாததாக உள்ளது. எனவே இது ஏதேனும் ஒன்றை மட்டும் தேர்ந்தெடுக்கும் விஷயம் அல்ல; மாறாக இரண்டையும் சமநிலையில் கொண்டு செல்லும் ஒரு தந்திரமான நடவடிக்கையாகும்.
ஆஸ்திரேலியா ஒரு பக்கத்தை மட்டும் தேர்ந்தெடுத்து மற்றொன்றைக் கைவிட வாய்ப்பில்லை; ஏனெனில் அது அதன் சொந்த நலன்களுக்கு உகந்தது அல்ல. இதைச் சமநிலைப்படுத்துவது போகப் போகக் கடினமாகி வருகிறது, ஆனால் ஆஸ்திரேலியா இதைச் செய்தாக வேண்டிய கட்டாயத்தில் உள்ளது.
