ஆஸ்திரேலியாவின் நியூ சவுத் வேல்ஸ் (NSW) மாநிலத்தில் உள்ள நோர்த் ஆல்பரி (North Albury) பகுதியில், ஒரு வாரத்திற்கு முன்பு கத்தியால் குத்தப்பட்ட 28 வயது இளைஞர் ஒருவர் உயிரிழந்ததையடுத்து, காவல்துறையினர் கொலை வழக்காகப் பதிவு செய்து தீவிர விசாரணையைத் தொடங்கியுள்ளனர்.
கடந்த செப்டம்பர் 27-ஆம் திகதி அதிகாலை 1 மணியளவில், நோர்த் ஆல்பரியின் காலிமோ வீதியில் (Calimo Street) கழுத்தில் கத்திகுத்து காயங்களுடன் உயிருக்குப் போராடிக்கொண்டிருந்த இளைஞரை மீட்டு, அவசர உதவிப் படையினர் மருத்துவமனையில் அனுமதித்தனர். எனினும், தீவிர சிகிச்சையளிக்கப்பட்டு வந்த நிலையில், அவர் ஞாயிற்றுக்கிழமை உயிரிழந்தார்.
ஒரு வார காலமாக தீவிர விசாரணை நடத்தப்பட்டு வந்த நிலையில், தற்போது இந்த வழக்குக் கொலை வழக்காக மாற்றப்பட்டு விசாரணை முடுக்கிவிடப்பட்டுள்ளதாக நியூ சவுத் வேல்ஸ் காவல்துறை கட்டளை அதிகாரி பால் ஸ்மித் (Paul Smith) தெரிவித்துள்ளார்.
பாதிக்கப்பட்ட இளைஞரின் குடும்பத்தினர் பெரும் சோகத்தில் ஆழ்ந்துள்ளதாகக் குறிப்பிட்ட அதிகாரி பால் ஸ்மித், "அவர்கள் எத்தகைய வேதனையைக் கடந்து கொண்டிருக்கிறார்கள் என்பதை ஊகிக்க முடிகிறது; அவர்களுக்கு உதவியாக நாங்கள் இருப்போம்" என்றும் கூறினார்.
சம்பவம் நடந்த இரவிலோ அல்லது அதற்குப் பிந்தைய நாட்களிலோ காலிமோ வீதி மற்றும் அதன் சுற்றுவட்டாரப் பகுதிகளில் இருந்த பொதுமக்கள் மற்றும் சாட்சியங்கள் யாரேனும் இருந்தால், உடனடியாகத் தகவல்களை வழங்கி உதவுமாறு காவல்துறையினர் வேண்டுகோள் விடுத்துள்ளனர்.
இந்தச் சம்பவத்தின்போது ஒன்றுக்கும் மேற்பட்ட நபர்கள் அங்கு இருந்திருக்கலாம் அல்லது என்ன நடந்தது என்பதைப் பற்றி அறிந்திருக்கலாம் எனத் தெரிகிறது. எனவே, காவல்துறையினரிடம் இதுவரை பேசாத சாட்சிகள் மற்றும் உயிரிழந்தவரின் நண்பர்கள், உடனடியாகத் துப்பறியும் அதிகாரிகளைத் தொடர்புகொள்ளுமாறு வலியுறுத்தப்படுகிறார்கள்.
தாக்குதலுக்குப் பயன்படுத்தப்பட்ட ஆயுதம் எது என்றும், இக்கொலைக்கான காரணம் என்ன என்றும் துப்பறியும் அதிகாரிகள் தொடர்ந்து விசாரணை நடத்தி வருகின்றனர்.
இச்சம்பவம் குறித்த முழுமையான அறிக்கை நியூ சவுத் வேல்ஸ் மரண விசாரணை அதிகாரியிடம் (Coroner) சமர்ப்பிக்கப்படவுள்ளது
