மிக மூத்த மற்றும் நீண்ட காலம் பணியாற்றிய கத்தோலிக்க மதகுருமார்களில் ஒருவரான புரூமின் முன்னாள் ஆயர் (Bishop), இரு இளைஞர்களுக்கு எதிராகப் பாலியல் குற்றங்களில் ஈடுபட்டதற்காக ஆறு ஆண்டுகளுக்கும் மேலான சிறைத்தண்டனையை எதிர்கொண்டுள்ளார்.
மேற்கு ஆஸ்திரேலியாவில் இங்கிலாந்தை விட மூன்று மடங்கு பெரிய தொலைதூரப் பகுதியின் ஆயராக இருந்தபோது, இந்த இளைஞர்களுக்கு எதிராகப் பல குற்றங்களைச் செய்ததாக 76 வயதான கிறிஸ்டோபர் ஆலன் சாண்டர்ஸ் என்பவர் இந்த ஆண்டின் தொடக்கத்தில் குற்றவாளியாக அறிவிக்கப்பட்டார்.
அவர் ஒரு பாலியல் குற்றம் மற்றும் பாலியல் அத்துமீறல் (Indecent Assault) குற்றங்களில் குற்றவாளி என உறுதி செய்யப்பட்டார்.
பாதிக்கப்பட்டவர்கள் கிம்பர்லி பிராந்தியத்தைச் சேர்ந்த பூர்வக்குடியின (Aboriginal) ஆண்கள் ஆவர். அங்குள்ள மக்கள் தொகையில் 40 சதவீதத்திற்கும் அதிகமானோர் பூர்வக்குடியின மக்கள் என்பது குறிப்பிடத்தக்கது.
பிரபல சுற்றுலாத் தலமான புரூமில் உள்ள முன்னாள் ஆயரின் கத்தோலிக்க திருச்சபைக்குச் சொந்தமான குடியிருப்பு மற்றும் "பீச் ஹவுஸ்" என்று அழைக்கப்படும் ஓய்வு இல்லம் உள்ளிட்ட பல்வேறு இடங்களில் இந்தத் தாக்குதல்கள் நடந்துள்ளன.
பாக்சர் உடைகளை மட்டும் அணிந்திருக்கும் இளம் ஆண்களுக்கு மது மற்றும் உணவை வழங்கி, சாண்டர்ஸ் சட்டை இல்லாத சந்திப்புகளை நடத்தியதாக நீதிமன்றத்தில் தெரிவிக்கப்பட்டது.
சாண்டர்ஸ் தனது கால்களைப் பயன்படுத்தி இளம் ஆண்களைப் பாலியல் ரீதியாகத் தொட்டதாகவும், அவர்களின் உதடுகளில் முத்தமிட்டதாகவும், அவர்களின் அந்தரங்க உறுப்புகளைப் பிடித்ததாகவும், ஒரு சந்தர்ப்பத்தில் சம்மதமின்றி வாய்வழிப் பாலியல் உறவில் ஈடுபட்டதாகவும் நீதிமன்றத்தில் தெரிவிக்கப்பட்டது.
மூன்று ஆண்களுக்கு எதிராகக் குற்றம் சாட்டப்பட்ட சாண்டர்ஸ், இருவர் தொடர்பான குற்றச்சாட்டுகளில் மட்டுமே குற்றவாளி எனத் தீர்ப்பளிக்கப்பட்டார்.
நீதிபதி மார்ட்டின் பிளின், 13 குற்றங்களுக்கும் தண்டனைகளை வழங்கினார். இதன்படி மொத்தம் ஆறரை ஆண்டுகள் சிறைத்தண்டனை விதிக்கப்பட்டது. அவர் 2031 பெப்ரவரியில் பிணைகோரி விண்ணப்பிக்கதகுதி பெறுவார்.
பல ஆண்டுகளாகச் சாண்டர்ஸால் பாலியல் வன்கொடுமைக்கு ஆளான பாதிக்கப்பட்டவர்களில் ஒருவர் நீதிமன்றத்தில் அளித்த வாக்குமூலத்தின் ஒரு பகுதியை நீதிபதி வாசித்தார்.
"என் தலை இப்போது வெடிக்கிறது, நான் மிகுந்த வலியில் இருக்கிறேன். என்னால் இதைப் பற்றிப் பேச முடியாது" என்று அதில் குறிப்பிடப்பட்டிருந்தது.
பாதிக்கப்பட்டவர்கள் "தங்கள் உடலை எவ்வாறு பயன்படுத்துவது என்பது குறித்துச் சுதந்திரமான முடிவெடுக்கும் உரிமை"யைச் சாண்டர்ஸ் பொருட்படுத்தவில்லை என்று நீதிபதி பிளின் கூறினார்.
ஆகஸ்ட் மாதம் குற்றவாளி என அறிவிக்கப்பட்டது முதல் காவலில் இருக்கும் சாண்டர்ஸ், தண்டனைகள் அறிவிக்கப்பட்ட பிறகும் எந்தவித உணர்ச்சியையும் வெளிப்படுத்தவில்லை.
விசாரணையின் போது அவர் தனது தற்காப்புக்காகச் சாட்சியமளிக்க வேண்டாம் என்று தேர்வு செய்ததால், பொலிஸார் எடுத்த நேர்காணல் பதிவுகள் மட்டுமே சாண்டர்ஸின் மறுப்புகளை நடுவர் மன்றத்தினர் (Jurors) கேட்க முடிந்த ஒரே சந்தர்ப்பமாக இருந்தது.
