ஆஸ்திரேலியாவின் சுயாதீன நாடாளுமன்ற உறுப்பினர் ஹெலன் ஹெய்ன்ஸுக்கு ஆதரவாக,  நாடாளுமன்றத்தில் உறுப்பினர்கள் உருக்கமான அஞ்சலியைச் செலுத்தியுள்ளனர். அவர் மீது நடத்தப்பட்டதாகக் கூறப்படும் தாக்குதல் இடம்பெற்று ஒரு வாரத்துக்குப் பின்னர், நாடாளுமன்ற நடவடிக்கைகள் இடைநிறுத்தப்பட்டு அவருக்கு ஆதரவு தெரிவிக்கப்பட்டுள்ளது.

கான்பெராவில் திங்கட்கிழமை (ஒக்டோபர் 26) மீண்டும் கூடிய மத்திய நாடாளுமன்றத்தில், பிரதமர் அந்தோனி அல்பானீஸ், ஹெலன் ஹெய்ன்ஸுக்கு ஆதரவு தெரிவிக்கும் வகையில் நாடாளுமன்ற நடவடிக்கைகளை அன்றைய தினம் இடைநிறுத்துவதற்கான பிரேரணையை முன்வைத்தார்.

வங்காரட்டா பகுதியில் அமைந்துள்ள தனது தொகுதி அலுவலகத்துக்கு வெளியே கடந்த ஒக்டோபர் 19ஆம் திகதி நான்கு சக்கர வாகனமொன்றால் மோதப்பட்டதாகக் கூறப்படும் சம்பவத்தில் ஹெய்ன்ஸ் கடுமையாகக் காயமடைந்தார். 

அவரது இரண்டு கால்களும் அகற்றப்பட்டுள்ள நிலையில், மெல்பேர்னில் உள்ள அல்பிரட் மருத்துவமனையில் அவர் தொடர்ந்து சிகிச்சை பெற்று வருகிறார். அவரது உடல்நிலை கவலைக்கிடமாக இருந்தாலும் சீராக இருப்பதாகத் தெரிவிக்கப்பட்டுள்ளது.

ஹெலன் ஹெய்ன்ஸின் பண்புகளைப் பாராட்டிய பிரதமர்

நாடாளுமன்றத்தில் உரையாற்றிய பிரதமர் அந்தோனி அல்பானீஸ், இந்தச் சம்பவத்தால் ஏற்பட்ட அதிர்ச்சி அனைவரது இதயங்களிலும் “ஒரு கல்லைப் போலக் கனமாக” இருப்பதாகக் குறிப்பிட்டார்.

நேர்மை, ஒருமைப்பாடு, இரக்கம், நகைச்சுவை உணர்வு மற்றும் பிறரது உணர்வுகளைப் புரிந்துகொள்ளும் பண்பு ஆகியவற்றைக் கொண்டவராக ஹெய்ன்ஸ் திகழ்ந்ததாக அவர் பாராட்டினார்.

மக்களைப் பிரிப்பவற்றைவிட அவர்களை ஒன்றிணைப்பவை அதிகம் என்ற உண்மையை ஹெய்ன்ஸ் எப்போதும் தனது செயற்பாடுகள் மூலம் வெளிப்படுத்தியதாகவும் பிரதமர் தெரிவித்தார்.

அவரது கணவர் பில் ஹெய்ன்ஸ் நாடாளுமன்றத்தில் இடம்பெற்ற அஞ்சலி நிகழ்வில் கலந்துகொண்டிருந்தார். இந்தக் கடினமான சூழ்நிலையிலும் அவர் வெளிப்படுத்திய மனவலிமையையும் கண்ணியத்தையும் நாடாளுமன்ற உறுப்பினர்கள் பாராட்டினர்.

சம்பவத்தின்போது ஹெய்ன்ஸுக்கு உதவ விரைந்து சென்ற பொதுமக்களும் பாராட்டப்பட்டனர்.

அரசியல் வன்முறைகள் குறித்து எச்சரிக்கை

சமூக ஊடகங்களில் நிலவும் அநாமதேயத் தன்மையும் தகவல்கள் வேகமாகப் பரவுவதும் கோபத்தையும் ஆக்கிரமிப்பு மனப்பான்மையையும் அதிகரிக்கச் செய்வதாகப் பிரதமர் சுட்டிக்காட்டினார்.

அரசியல் துறையில் மட்டுமன்றி, உணவகங்கள் மற்றும் சில்லறை விற்பனை நிலையங்களில் பணியாற்றுவோர், பாடசாலைகள், மருத்துவமனைகள், பொலிஸார், அவசர மருத்துவப் பணியாளர்கள் மற்றும் ஏனைய அதிகாரிகள் மீதும் அச்சுறுத்தல்களும் தாக்குதல்களும் அதிகரித்து வருவதாக அவர் தெரிவித்தார்.

கோபத்தையும் வன்முறையையும் வெளிப்படுத்தும் மொழி சமூகத்தில் இயல்பான ஒன்றாக மாறிவருவது கவலைக்குரியது என்றும் அவர் குறிப்பிட்டார்.

அரசியல் கருத்து வேறுபாடுகள் எப்போதும் இருந்துள்ளன. எனினும், அவை உரையாடலையும் ஒத்துழைப்பையும் முடிவுக்குக் கொண்டுவரும் நிலைக்குச் செல்லக்கூடாது என அல்பானீஸ் வலியுறுத்தினார்.

ஹெய்ன்ஸ் மதிக்கும் ஜனநாயக விழுமியங்களைத் தொடர்ந்து பாதுகாத்து, சிறந்த சமூகத்தை உருவாக்குவதற்கான முயற்சிகளை முன்னெடுக்க வேண்டும் என்றும் அவர் தெரிவித்தார்.

எதிர்க்கட்சித் தலைவரும் அஞ்சலி

எதிர்க்கட்சித் தலைவர் அங்கஸ் டெய்லரும் ஹெய்ன்ஸுக்கு அஞ்சலி செலுத்தினார். அவர் நாகரிகமான அரசியல் கலாசாரத்தின் சிறந்த எடுத்துக்காட்டாகத் திகழ்வதாக டெய்லர் குறிப்பிட்டார்.

ஹெய்ன்ஸ் மீதான தாக்குதல் புரிந்துகொள்ள முடியாத அளவுக்கு அதிர்ச்சியளிப்பதாகக் குறிப்பிட்ட அவர், அந்தச் சம்பவத்தில் வெளிப்பட்ட ஒருவரின் கொடூரத்துக்கு மாறாக, பல அவுஸ்திரேலியர்கள் வெளிப்படுத்திய துணிவும் கண்ணியமும் பாராட்டத்தக்கவை என்றார்.

அதேவேளை, நாடாளுமன்றத்தில் கடுமையான அரசியல் விவாதங்கள் நடைபெறுவதற்கும் அரசியல் வன்முறைகளுக்கும் நேரடித் தொடர்பு இருப்பதாகக் கூறப்படும் கருத்தை லிபரல் கட்சி நிராகரித்தது.

கருத்து வேறுபாடுகளை வெளிப்படுத்தும் உரிமை ஜனநாயகத்தின் முக்கிய அம்சம் எனக் குறிப்பிட்ட டெய்லர், அந்த விவாதங்கள் ஒருபோதும் வன்முறையாக மாற அனுமதிக்கப்படக்கூடாது என்றார்.

சக உறுப்பினர்கள் உருக்கமான அஞ்சலி

ஹெய்ன்ஸுடன் நாடாளுமன்றத்தில் நெருக்கமாகப் பணியாற்றும் சுயேச்சை உறுப்பினர் ஸாலி ஸ்டெக்கால், இந்தச் சம்பவத்தால் ஏற்பட்ட அதிர்ச்சியையும் துயரத்தையும் வார்த்தைகளால் விவரிப்பது கடினம் எனத் தெரிவித்தார்.

ஹெய்ன்ஸ், அவரது கணவர் பில், அவர்களது பிள்ளைகள் மற்றும் பேரப்பிள்ளைகளுக்கு தனது ஆழ்ந்த அனுதாபங்களை அவர் தெரிவித்தார்.

மற்றொரு சுயேச்சை நாடாளுமன்ற உறுப்பினரான மோனிக் ரயன், ஹெய்ன்ஸ் தாராள மனப்பான்மை, அன்பு, நேர்மை மற்றும் மரியாதையின் அடையாளமாகத் திகழ்வதாகக் குறிப்பிட்டார்.

அரசியல் சூழலில் அதிகரித்துவரும் பகைமை மற்றும் பெண்கள் தலைவர்களுக்கு எதிரான அவமதிப்புகள் குறித்தும் அவர் கவலை வெளியிட்டார். பொதுமக்களிடையே கருத்துகளை வெளிப்படுத்தும் விதத்தில் ஊடகங்களுக்கும் பொறுப்பு இருப்பதாகவும் அவர் தெரிவித்தார்.

லிபரல் கட்சியின் முன்னணி உறுப்பினர் ஆண்ட்ரூ ஹேஸ்டி, அமெரிக்காவில் காணப்படும் தனிநபர்களை இலக்காகக் கொண்ட கடுமையான அரசியல் அணுகுமுறைகளை அவுஸ்திரேலியாவில் தவிர்க்க வேண்டும் என வலியுறுத்தினார்.

அரசியல்வாதிகள் நாடாளுமன்றத்திலும் இணையத்திலும் பயன்படுத்தும் வார்த்தைகள் அரசியல் கலாசாரத்தை வடிவமைப்பதாகக் குறிப்பிட்ட அவர், தனிநபர்களைத் தாக்குவதற்குப் பதிலாக அவர்களின் கருத்துகளுடன் விவாதிக்க வேண்டும் என்றார்.

நன்கொடைகள் 1.2 மில்லியன் டொலர்களைக் கடந்தன

ஹெலன் ஹெய்ன்ஸின் குடும்பத்தினர், மலர்களுக்குப் பதிலாக சிறுவர் நல அமைப்பான Save the Children நிறுவனத்துக்கு நன்கொடை வழங்குமாறு கோரியிருந்தனர். இதற்காக முன்னெடுக்கப்பட்ட நிதி சேகரிப்புத் திட்டத்தின் மூலம் திங்கட்கிழமை காலை வரை 1.2 மில்லியன் அவுஸ்திரேலிய டொலர்களுக்கும் அதிகமான தொகை திரட்டப்பட்டுள்ளது.

நாடு முழுவதிலுமிருந்து பொதுமக்களும் அரசியல்வாதிகளும் நன்கொடைகளை வழங்கியுள்ளனர்.

இதற்கிடையில், ஹெய்ன்ஸ் மீதான தாக்குதலுக்கான நோக்கம் குறித்து பொலிஸார் தொடர்ந்து விசாரணைகளை மேற்கொண்டு வருகின்றனர். சந்தேகநபரான 43 வயதுடைய பிரெண்டன் நுஜென்ட் இணையத்தில் அரசியல் தொடர்பான கருத்துகளைப் பதிவிட்டிருந்ததாகத் தெரிவிக்கப்பட்டுள்ளது.

இந்தச் சம்பவத்தைத் தொடர்ந்து, அரசியல்வாதிகளுக்கு எதிரான அச்சுறுத்தல்கள், துன்புறுத்தல்கள் மற்றும் பாதுகாப்பு அச்சங்கள் அதிகரித்து வருவது குறித்து பல நாடாளுமன்ற உறுப்பினர்கள் கவலை வெளியிட்டுள்ளனர்.

இணையத்தில் தீங்கு விளைவிக்கும் உள்ளடக்கங்களைக் கட்டுப்படுத்துவதையும், டிஜிட்டல் தளங்களின் தவறான செயற்பாடுகளைத் தடுப்பதையும் நோக்கமாகக் கொண்ட அரசாங்கத்தின் டிஜிட்டல் பொறுப்புக் கடமைச் சட்டமூலம் தொடர்பான விவாதம் இந்த வாரத்தின் பிற்பகுதியில் கீழவையில் நடைபெறவுள்ளது.

இந்தச் சட்டமூலத்தை ஆண்டு இறுதிக்குள் நிறைவேற்ற அரசாங்கம் எதிர்பார்க்கிறது. எனினும், இது அரசியல் கருத்துகளைத் தணிக்கை செய்வதற்கு வழிவகுக்கலாம் என எதிர்ப்பாளர்கள் வாதிடுகின்றனர்.

அரசியல் தலைவர்களுக்கு எதிரான அச்சுறுத்தல்கள் அதிகரித்து வரும் நிலையில், இணையத்தில் தீங்கு விளைவிக்கும் செயற்பாடுகளைக் கட்டுப்படுத்த மேலதிக நடவடிக்கைகள் அவசியம் என அரசாங்கம் வலியுறுத்தியுள்ளது.

இதற்கிடையில், பிராந்தியப் பகுதிகளில் மனநலப் பராமரிப்புச் சேவைகளில் காணப்படும் குறைபாடுகள் குறித்தும் அவுஸ்திரேலிய மத்திய பொலிஸ் ஆணையாளர் கிரிஸி பாரெட் கவலை வெளியிட்டுள்ளார். ஹெய்ன்ஸ் மீதான தாக்குதலின் பின்னணி தொடர்பான விசாரணைகள் தொடர்ந்து நடைபெற்று வருகின்றன.