ஆஸ்திரேலியாவின் அனைத்து 85 இரத்ததான நிலையங்களிலும் இரத்ததானம் செய்து மெல்பேர்னைச் சேர்ந்த பொலிஸ் அதிகாரியொருவர் புதிய சாதனை படைத்துள்ளார்.
59 வயதான ட்ரெவர் பேர்க்மன் (Trevor Bergman) என்பவரே இந்தச் சாதனையை நிகழ்த்தியுள்ளார்.
அண்மையில் கன்பராவில் பிளாஸ்மா தானம் செய்ததன் மூலம் ஆஸ்திரேலியாவின் அனைத்து இரத்ததான நிலையங்களிலும் தானம் செய்த தனது இலக்கை அவர் நிறைவேற்றியுள்ளார்.
18 வயதிலிருந்து இரத்ததானம் செய்து வரும் இவர், இதுவரை மொத்தமாக 545 தடவைகள் இரத்தம் மற்றும் பிளாஸ்மா தானம் செய்துள்ளார்.
சுமார் 10 ஆண்டுகளுக்கு முன்னர் பேர்த் நகருக்கு விடுமுறைக்குச் சென்றிருந்தபோது, அங்குள்ள இரத்ததான நிலையத்தில் இரத்ததானம் செய்த அனுபவமே நாடு முழுவதும் உள்ள இரத்ததான நிலையங்களுக்கும் சென்று தானம் செய்ய வேண்டும் என்ற எண்ணத்தை அவருக்கு ஏற்படுத்தியுள்ளது.
இதன் மூலம் அவுஸ்திரேலியாவின் கிழக்குக் கரையோரப் பகுதிகள், மேற்கு அவுஸ்திரேலியா மற்றும் டார்வின் உள்ளிட்ட பல இடங்களுக்குச் செல்லும் வாய்ப்பும் அவருக்குக் கிடைத்துள்ளது.
அரிய இரத்த எதிர்ப்பணுவைக் கொண்ட கொடையாளர்
ட்ரெவர் பேர்க்மன், அவுஸ்திரேலியாவில் Anti-D எனப்படும் அரிய இரத்த எதிர்ப்பணுவைக் கொண்ட சுமார் 150 பேரில் ஒருவராவார்.
ஆஸ்திரேலிய செஞ்சிலுவைச் சங்கத்தின் Lifeblood அமைப்பைச் சேர்ந்த ஆணியா டாண்டன் தெரிவிக்கையில், இந்த எதிர்ப்பணு ஆண்டுதோறும் சுமார் 48,000 கர்ப்பிணிப் பெண்களுக்கு வழங்கப்பட்டு, அவர்களின் குழந்தைகளைப் பிறந்த குழந்தைகளுக்கான ஹீமோலிடிக் நோய் (Haemolytic Disease of the Newborn) பாதிப்பிலிருந்து பாதுகாக்க உதவுவதாகக் குறிப்பிட்டுள்ளார்.
தாயின் இரத்த வகை Rh எதிர்மறையாகவும் (Rh Negative), குழந்தையின் இரத்த வகை Rh நேர்மறையாகவும் (Rh Positive) இருக்கும்போது, தாயின் நோயெதிர்ப்பு முறை குழந்தையின் இரத்த அணுக்களைத் தாக்கும் அபாயம் ஏற்படலாம். இத்தகைய பாதிப்பைத் தடுப்பதில் Anti-D எதிர்ப்பணு முக்கிய பங்கு வகிக்கிறது.
தனது 545 இரத்ததான அனுபவங்களில் மறக்க முடியாத சம்பவமாக மேற்கு அவுஸ்திரேலியாவின் அல்பனி நகரில் உடல்நலக் குறைவு காரணமாக இரத்ததானம் செய்ய அனுமதி மறுக்கப்பட்ட சம்பவத்தை அவர் நினைவுகூர்ந்துள்ளார்.
அத்துடன், கடந்த மே மாதம் கன்பராவில் தனது இறுதி இலக்கான 85ஆவது நிலையத்தில் பிளாஸ்மா தானம் செய்தபோது, அவுஸ்திரேலிய ஆளுநர் நாயகம் சாம் மோஸ்டினும் (Sam Mostyn) அவருடன் இணைந்து இரத்ததானம் செய்திருந்தமை குறிப்பிடத்தக்கது.
இரத்தம் மற்றும் பிளாஸ்மாவுக்கான தேவை அதிகரிப்பு
புற்றுநோயாளிகள், தன்னுடல் தாக்க நோய்களால் பாதிக்கப்பட்டவர்கள் மற்றும் வீதி விபத்துகளில் காயமடைந்தவர்கள் உள்ளிட்ட பலரின் சிகிச்சைகளுக்கு இரத்தம், பிளாஸ்மா மற்றும் இரத்தத் தட்டுக்கள் பயன்படுத்தப்படுகின்றன.
அவுஸ்திரேலியாவில் மூன்றில் ஒருவருக்கு அவர்களது வாழ்நாளில் ஏதேனும் ஒரு கட்டத்தில் இரத்தம் தேவைப்படும் என Lifeblood அமைப்பின் ஆணியா டாண்டன் தெரிவித்துள்ளார்.
நீண்டகாலமாக நீடித்த காய்ச்சல் மற்றும் தடிமன் பரவல் காரணமாக, கடந்த பத்து ஆண்டுகளில் இல்லாத அளவுக்கு இரத்தம் மற்றும் பிளாஸ்மா இருப்பு குறைந்திருந்தது. இதனைத் தொடர்ந்து விடுக்கப்பட்ட அவசர அழைப்பையடுத்து இரத்ததானம் செய்பவர்களின் எண்ணிக்கை அதிகரித்துள்ளதாகவும் அவர் குறிப்பிட்டுள்ளார்.
அவுஸ்திரேலியாவில் வயது வந்தோரில் சுமார் 60 சதவீதமானோர் இரத்ததானம் செய்யத் தகுதியுடையவர்களாக இருந்தாலும், அவர்களில் சுமார் 3 சதவீதமானோர் மட்டுமே இரத்ததானம் செய்வதாகவும் தெரிவிக்கப்பட்டுள்ளது.
இரத்தத்தின் தேவை ஒருபோதும் இடைநிறுத்தப்படுவதில்லை என்பதால், பொதுமக்கள் இரத்ததானத்தைத் தங்களது வழக்கமான பழக்கமாக மாற்றிக்கொள்ள வேண்டும் என Lifeblood அமைப்பு வலியுறுத்தியுள்ளது.
சமூகத்திற்கு உதவ வேண்டும் என்ற விருப்பமும் அவுஸ்திரேலியாவின் பல்வேறு பகுதிகளைக் கண்டறிய வேண்டும் என்ற ஆர்வமுமே இந்தச் சாதனையை நிறைவேற்றத் தன்னைத் தூண்டியதாக ட்ரெவர் பேர்க்மன் தெரிவித்துள்ளார்.
