சிட்னியைச் சேர்ந்த திமிங்கில ஆய்வு நிபுணரும் அறிவியல் தொடர்பாடலாளருமான டாக்டர் வான்சா பிரொட்டா, 2027ஆம் ஆண்டுக்கான நியூ சவுத் வேல்ஸ் மாநிலத்தின் சிறந்த ஆஸ்திரேலியர் விருதுக்குத் தெரிவு செய்யப்பட்டுள்ளார்.

கடல்வாழ் உயிரினங்கள் தொடர்பான அறிவியல் ஆய்வுகளில் முன்னணி நிபுணராகத் திகழும் டாக்டர் பிரொட்டா, திமிங்கிலங்களின் உடல்நலத்தை மதிப்பிடுவதற்கான புதிய ஆய்வு முறைகளை அறிமுகப்படுத்தியுள்ளார். திமிங்கிலங்கள் மூச்சுவிடுவதற்காக நீரின் மேற்பரப்புக்கு வரும்போது, அவற்றின் சுவாசத் துளையிலிருந்து வெளியேறும் சளி மாதிரிகளை ட்ரோன்கள் மூலம் சேகரித்து ஆய்வு செய்வது அவரது முக்கியமான கண்டுபிடிப்புகளில் ஒன்றாகும்.

மேலும், ஐந்து ஆண்டுகளுக்கு முன்னர் ‘வைல்ட் சிட்னி ஹார்பர்’ (Wild Sydney Harbour) என்ற குடிமக்கள் அறிவியல் திட்டத்தையும் அவர் ஆரம்பித்தார். இதன் மூலம் சிட்னி துறைமுகப் பகுதியில் காணப்படும் கடல்வாழ் உயிரினங்கள் தொடர்பான தகவல்களைச் சேகரிப்பதற்காக, அப்பகுதி மக்கள் மற்றும் சுற்றுலாப் பயணிகள் தாங்கள் காணும் உயிரினங்கள் குறித்த தகவல்களைப் பகிர ஊக்குவிக்கப்படுகின்றனர்.

அறிவியல், தொழில்நுட்பம், பொறியியல், கலை மற்றும் கணிதம் (STEAM) ஆகிய துறைகளில் பெண்களின் பங்களிப்பை ஊக்குவிப்பதிலும் டாக்டர் பிரொட்டா தீவிரமாகச் செயற்பட்டு வருகிறார். அத்துடன், சிட்னியின் பொட்டனி விரிகுடாவைத் தளமாகக் கொண்ட பழங்குடியினக் கடல்சார் பாதுகாப்புக் குழுவான ‘கமாய் ரேஞ்சர்ஸ்’ (Gamay Rangers) அமைப்புடன் இணைந்து கடல்வாழ் உயிரினங்களின் எண்ணிக்கையைக் கண்காணிக்கும் பணிகளிலும் ஈடுபட்டுள்ளார்.

கன்பராவுக்கு அருகிலுள்ள முர்ரம்பேட்மன் பகுதியில் பண்ணைச் சூழலில் வளர்ந்த அவர், ‘ஃப்ரீ வில்லி’ திரைப்படம் மற்றும் டேவிட் அட்டன்பரோவின் ஆவணப்படங்கள் தன்னை கடல்சார் அறிவியல் துறையில் ஈடுபடத் தூண்டியதாகத் தெரிவித்துள்ளார்.

இதனையடுத்து, அடுத்த ஆண்டு ஜனவரி 25ஆம் திகதி அறிவிக்கப்படவுள்ள தேசிய அளவிலான ‘ஆண்டின் சிறந்த ஆஸ்திரேலியர்’ விருதுக்கான நியூ சவுத் வேல்ஸ் மாநிலத்தின் பிரதிநிதியாக டாக்டர் பிரொட்டா பரிந்துரைக்கப்படவுள்ளார்.

இந்த விருதுக்காக நியூகாசிலைச் சேர்ந்த குடும்ப வன்முறைக்கு எதிரான செயற்பாட்டாளர் தபிதா அக்ரெட், பார்கின்சன் நோய் தொடர்பான விழிப்புணர்வுப் பணியாளர் கிளைட் காம்ப்பெல் மற்றும் மாற்றுத்திறனாளிகளின் உரிமைகளுக்காகச் செயற்படுபவர் டுவைன் பெர்னாண்டஸ் ஆகியோரும் பரிந்துரைக்கப்பட்டிருந்தனர்.

இளம் ஆஸ்திரேலியர் விருதைப் பெற்ற டேனி ஸ்கௌட்டன்

சுறா மீன் தாக்குதல்களின்போது உயிர்களைக் காப்பாற்ற உதவும் முதலுதவிப் பெட்டிகளை உருவாக்கிய ‘கம்யூனிட்டி ஷார்க் பைட் கிட்ஸ்’ (Community Shark Bite Kits) அமைப்பின் நிறுவனர் டேனி ஸ்கௌட்டன், 2027ஆம் ஆண்டுக்கான நியூ சவுத் வேல்ஸ் மாநிலத்தின் சிறந்த இளம் ஆஸ்திரேலியர் விருதைப் பெற்றுள்ளார்.

கடந்த ஜூன் மாதம் சிட்னியின் கூஜி கடற்கரையிலும், ஜனவரி மாதம் நார்த் ஸ்டெய்ன் கடற்கரையிலும் இடம்பெற்ற சுறா மீன் தாக்குதல்களைத் தொடர்ந்து, இத்தகைய முதலுதவிப் பெட்டிகளின் அவசியம் அதிக கவனம் பெற்றுள்ளது.

கூஜி கடற்கரையில் இடம்பெற்ற சுறா மீன் தாக்குதலில் உயிர் தப்பிய லியா ஸ்டீவர்ட், டேனி ஸ்கௌட்டன் உருவாக்கிய முதலுதவிப் பெட்டியைப் பயன்படுத்தி காப்பாற்றப்பட்ட முதல் நபராவார்.

“அன்று அந்த முதலுதவிப் பெட்டி அங்கு இருந்ததும், அதனைப் பயன்படுத்த முடிந்ததும் எனக்கு மிகுந்த மகிழ்ச்சியை அளிக்கிறது” என டேனி ஸ்கௌட்டன் தெரிவித்துள்ளார்.

கடற்கரைகளில் இத்தகைய முதலுதவிப் பெட்டிகள் அவசியம் என்பதைத் தனது நண்பர் ஒருவர் சுறா மீன் தாக்குதலிலிருந்து உயிர் தப்பிய சம்பவத்தின் மூலம் உணர்ந்ததாக அவர் கூறினார். அப்போது, சம்பவத்தை நேரில் கண்ட ஒருவர் நாயைக் கட்டுவதற்குப் பயன்படுத்தும் பட்டையை உபயோகித்து இரத்தப்போக்கைக் கட்டுப்படுத்தும் கட்டை (Tourniquet) ஒன்றை உருவாக்கி உதவியிருந்தார்.

இந்த அனுபவத்தைத் தொடர்ந்து, குறிப்பாக உயிர்காப்புப் பணியாளர்கள் இல்லாத கடற்கரைகளில் இத்தகைய முதலுதவிப் பெட்டிகள் அவசியம் என்பதை அவர் வலியுறுத்தினார்.

இரத்தப்போக்கைக் கட்டுப்படுத்தும் கட்டுகள், அழுத்தக் கட்டுகள், கையுறைகள் மற்றும் சுறா மீன் தாக்குதலின்போது மேற்கொள்ள வேண்டிய முதலுதவி வழிமுறைகள் ஆகியவற்றை உள்ளடக்கிய இந்தப் பெட்டிகள் தற்போது அவுஸ்திரேலியாவின் 350க்கும் மேற்பட்ட கடற்கரைகளில் வைக்கப்பட்டுள்ளன.

மத்திய வடக்குக் கரையோரப் பகுதியில் உள்ள பொன்னி ஹில்ஸ் பகுதியில் வசிக்கும் டேனி ஸ்கௌட்டன், முழுநேர ஆசிரியராகப் பணியாற்றி வருகிறார். அவுஸ்திரேலியாவில் உள்ள 20,000 கடற்கரைகளிலும் இத்தகைய முதலுதவிப் பெட்டிகளை வைக்க வேண்டும் என்பதே தனது இலக்கு என அவர் தெரிவித்துள்ளார்.

“மற்றவர்களுக்குத் திருப்பிச் சேவை செய்வதும், உயிர்களைக் காப்பாற்றுவதற்காக என்னால் முடிந்த ஒன்றைச் செய்வதுமே எனது ஆர்வம்” என்றும் அவர் குறிப்பிட்டார்.

இதற்கிடையில், கடற்கரைகளில் அதிகரித்து வரும் சுறா மீன் நடமாட்டத்தைக் கருத்திற்கொண்டு, நியூ சவுத் வேல்ஸ் மாநில அரசு, கடற்கரையோரம் உள்ள 97 கடற்கரைகளில் ஆண்டு முழுவதும் ட்ரோன்கள் மூலம் சுறா மீன்களைக் கண்காணிக்கும் திட்டத்தை விரிவுபடுத்தியுள்ளது.

மூத்த ஆஸ்திரேலியர் விருது விமானி மருத்துவருக்கு

தொலைதூர மற்றும் பிராந்தியப் பகுதிகளில் வசிக்கும் மக்களுக்கு ஆறு தசாப்தங்களுக்கும் மேலாக மருத்துவச் சேவையாற்றி வரும் டாக்டர் டேவிட் கூக், 2027ஆம் ஆண்டுக்கான நியூ சவுத் வேல்ஸ் மாநிலத்தின் சிறந்த மூத்த ஆஸ்திரேலியர் விருதைப் பெற்றுள்ளார்.

84 வயதான அவர், மருத்துவப் பணியையும் விமானப் பயணத்தையும் ஒருங்கிணைத்து, ரோயல் பிளையிங் டாக்டர் சேவை (Royal Flying Doctor Service) ஊடாக வடக்குப் பிரதேசம் மற்றும் வடக்கு குயின்ஸ்லாந்து உள்ளிட்ட தொலைதூரப் பகுதிகளில் வசிக்கும் மக்களுக்கு மருத்துவ உதவிகளை வழங்கியுள்ளார்.