நியூ சவுத் வேல்ஸ் மாநிலத்தில் உள்ள வைத்தியசாலைகளில் பாதுகாப்பை பலப்படுத்தும் வகையில், 27 வைத்தியசாலைகளுக்கு மேலதிகமாக 129 பாதுகாப்புப் பணியாளர்களை நியமிக்க மாநில அரசு தீர்மானித்துள்ளது.
சிட்னியின் கொன்கோர்ட் (Concord) வைத்தியசாலையில் பெண் நோயாளி ஒருவரால் இரண்டு தாதியர்கள் தாக்கப்பட்டதாகக் கூறப்படும் சம்பவத்தைத் தொடர்ந்து இந்த நடவடிக்கை எடுக்கப்பட்டுள்ளது.
கடந்த செவ்வாய்க்கிழமை இடம்பெற்ற இச்சம்பவத்தில், 44 வயதுடைய பெண் நோயாளி ஒருவர், 34 மற்றும் 57 வயதுடைய இரண்டு தாதியர்களைத் தாக்கியதாக நியூ சவுத் வேல்ஸ் பொலிஸார் தெரிவித்துள்ளனர்.
இதனையடுத்து குறித்த நோயாளி கட்டுப்படுத்தப்பட்டு மயக்க மருந்து வழங்கப்பட்டுள்ளார். சம்பவம் இடம்பெற்று சுமார் மூன்று மணித்தியாலங்களின் பின்னரே பொலிஸாருக்கு தகவல் வழங்கப்பட்டுள்ளது.
இந்தத் தாக்குதலில் காயமடைந்த இரண்டு தாதியர்களும் மருத்துவ சிகிச்சை பெற்றுள்ளனர். அவர்களில் ஒருவரின் மணிக்கட்டில் எலும்பு முறிவு ஏற்பட்டுள்ளதாக மாநில சுகாதார அமைச்சர் ரயன் பார்க் தெரிவித்துள்ளார்.
இதனைத் தொடர்ந்து, மாநிலம் முழுவதும் உள்ள 27 மருத்துவமனைகளில் மேலதிகமாக 129 முழுநேர பாதுகாப்புப் பணியாளர்களை நியமிக்க நடவடிக்கை எடுக்கப்பட்டுள்ளதாக அவர் குறிப்பிட்டுள்ளார்.
மருத்துவமனைகளில் நோயாளர்கள், பார்வையாளர்கள் மற்றும் ஏனைய தரப்பினரால் ஏற்படக்கூடிய வன்முறைச் சம்பவங்களை முன்கூட்டியே தடுத்து, மருத்துவப் பணியாளர்களின் பாதுகாப்பை உறுதிப்படுத்துவதே இந்நடவடிக்கையின் நோக்கமாகும் என சுகாதார சேவைகள் சங்கத்தின் செயலாளர் ஜெரார்ட் ஹேய்ஸ் தெரிவித்துள்ளார்.
இதற்கிடையில், மருத்துவமனை பாதுகாப்புப் பணியாளர்களுக்கு மேலதிக அதிகாரங்களை வழங்குவது குறித்தும் அரசு ஆராய்ந்து வருவதாக அமைச்சர் ரயன் பார்க் தெரிவித்துள்ளார். எனினும், இது தொடர்பில் இதுவரை இறுதி முடிவு எடுக்கப்படவில்லை என்றும் அவர் குறிப்பிட்டுள்ளார்.
மறுபுறம், சிட்னியின் ரோயல் நார்த் ஷோர் மருத்துவமனையில் பாதுகாப்புப் பணியாளராகப் பணியாற்றும் புரூஸ் ரோலிங், பணியின்போது பலமுறை காயமடைந்துள்ளதாகத் தெரிவித்துள்ளார்.
சுமார் 650 படுக்கைகளைக் கொண்ட பெரிய மருத்துவமனையொன்றில் ஒரே நேரத்தில் பொதுவாக நான்கு பாதுகாப்புப் பணியாளர்களே கடமையில் இருப்பதாகவும், நோயாளர்கள் மற்றும் பார்வையாளர்களின் எண்ணிக்கையைக் கருத்திற்கொள்ளும்போது இந்த எண்ணிக்கை போதுமானதாக இல்லை என்றும் அவர் சுட்டிக்காட்டியுள்ளார்.
மேலும், மெத்தம்பெட்டமைன் (Methamphetamine) உள்ளிட்ட போதைப்பொருட்களின் பயன்பாடு அதிகரித்துள்ளமை, மருத்துவமனைகளில் வன்முறைச் சம்பவங்கள் அதிகரிப்பதற்கான காரணங்களில் ஒன்றாக இருப்பதாகவும் அமைச்சர் ரயன் பார்க் தெரிவித்துள்ளார்.
மருத்துவமனைகளில் தாதியர்கள் மற்றும் ஏனைய சுகாதாரப் பணியாளர்களின் பாதுகாப்பை உறுதிப்படுத்த மேலதிக நடவடிக்கைகள் அவசியம் எனவும் அவர் வலியுறுத்தியுள்ளார்.
