வடக்கு, கிழக்கில்  இராணுவத்தினரின் வசம் இருந்த 700 ஏக்கருக்கும் அதிகமான காணிகள் விடுவிக்கப்பட்டுள்ளதாக  பாதுகாப்பு பிரதி அமைச்சர் சபையில் தெரிவித்தார்.

நாடாளுமன்ற உறுப்பினர் சத்தியலிங்கம் எழுப்பிய கேள்விக்கு நேற்று பதிலளித்த பாதுகாப்பு பிரதி அமைச்சர் மேஜர் ஜெனரல் அருண ஜயசேகர, விடுவிக்கப்பட்ட காணிகள் தொடர்பான புள்ளிவிபரங்களையும்  வெளியிட்டார். 

இதற்கமைய 2025ஆம் ஆண்டில் இருந்து இதுவரையில், வடக்கு, கிழக்கில்  இராணுவத்தினரின் வசம் இருந்த 700 ஏக்கருக்கும் அதிகமான காணிகள் விடுவிக்கப்பட்டுள்ளதாக அவர் குறிப்பிட்டுள்ளார். 

வடக்கில், இந்த ஆண்டு இதுவரை, 672.24 ஏக்கர் காணிகள் அரச படையினரால் விடுவிக்கப்பட்டுள்ளன. அவற்றில், 86.24 ஏக்கர் காணிகள் தனியார் காணிகள் என்றும், 586 ஏக்கர் அரச காணிகளாகும்.

கிழக்கில் 34.58 ஏக்கர் அரச காணிகள் விடுவிக்கப்பட்டுள்ளன. வவுனியாவில் ஈச்சங்குளம் காணிகளை விடுவிப்பது தொடர்பாக தற்போது ஆராயப்பட்டு வருகிறது. அவை விரைவில் விடுவிக்கப்படும். 

காணிகள் விடுவிப்பு தொடர்பாக தேசிய பாதுகாப்புச் சபையிலும், தேசிய பாதுகாப்புக்கான துறைசார் ஆலோசனைக் குழுவிலும் அனுமதி பெறப்பட்டுள்ளன என்றும் மேஜர் ஜெனரல் அருண ஜயசேகர குறிப்பிட்டுள்ளார்.