தமிழ் பொதுவேட்பாளர் விடயத்தால் தமிழ் மக்களுக்கு ஒன்றும் கிடைக்கப்போவதில்லை. எனவே, இந்த ஜனாதிபதி தேர்தலை தமிழர் தரப்பு சரிவர பயன்படுத்த வேண்டும் என்று இலங்கைத் தமிழரசுக் கட்சியின் நாடாளுமன்ற உறுப்பினர் சாணக்கியன் தெரிவித்தார்.
அத்துடன், அடுத்த ஐந்து வருடங்களுக்கு இணக்க அரசியல் பற்றி சந்திக்க வேண்டும் எனவும் அவர் கூறினார்.
தனியார் தொலைக்காட்சியொன்றில் ஒளிபரப்பான அரசியல் விவாத நிகழ்ச்சியில் கலந்துகொண்டு கருத்து வெளியிடுகையிலேயே அவர் இவ்வாறு கூறினார்.
“ஜனாதிபதி தேர்தலில் யாருக்கு ஆதரவளிப்பதென தமிழரசுக் கட்சி இன்னும் முடிவெடுக்கவில்லை. தமிழ் பொதுவேட்பாளரை ஆதரிப்பது பற்றியும் தீர்மானம் எடுக்கப்படவில்லை. எனினும், தமிழரசுக் கட்சியின் அனுமதியின்றி பொதுவேட்பாளராக களமிறங்கியுள்ள கட்சியின் மத்திய குழு உறுப்பினரிடம் விளக்கம் கோரப்பட்டுள்ளது.
தமிழ் பொதுவேட்பாளர் என்பது நாடகம் என்பது எனது கருத்து, இதுபோன்று கட்சிக்குள் பல கருத்துகள் இருக்கலாம். இறுதியில் கட்சி எடுக்கும் முடிவுக்கு நாம் கட்டுப்படுவோம்.
தென்னிலங்கையில் உள்ள மூன்று பிரதான வேட்பாளர்களில் ஒருவர்தான் ஜனாதிபதி தேர்தலில் வெற்றி பெறபோகின்றார், எனவே, தமிழ் பொதுவேட்பாளரை கொள்கை அளவில் நாம் ஆதரித்தாலும் தமிழ் மக்களுக்கு எதுவும் கிடைக்கப்போவதில்லை.
நாட்டில் ஜனாதிபதியொருவரை தீர்மானிக்கும் சக்தியாக நாம் இருக்கின்றபோது, அதனை சரிவர பயன்படுத்திக்கொள்ள வேண்டும். 2015 இல் நாம் ஆதரித்த வேட்பாளர் வெற்றிபெற்றார். அதன்மூலம் காணி விடுவிப்பு உட்பட பல நன்மைகள் கிடைக்கப்பெற்றன. புதிய அரசமைப்பை இயற்றுவதற்குரிய ஏற்பாடுகள்கூட இடம்பெற்றன. எனினும், அரசியல் குழப்பம் ஏற்பட்டதால் அம்முயற்சி கைகூடவில்லை.
அதேவேளை, மாகாணங்களுக்கு அதிகாரப்பகிர்வு கிட்டும்வரை மத்தியில் ஆட்சியுடன் கூட்டுசேர்வதில்லை என்பது கட்சியில் கொள்கை. ஆனால் அடுத்த ஐந்தாண்டுகளுக்கு இணக்க அரசியல் அவசியம் என்பது எனது தனிப்பட்ட கருத்து.
2015 இல் மைத்திரி எமது ஆதரவுடன் ஜனாதிபதியானதால்தான் போருக்கு பின்னரான இறுக்கமான சூழ்நிலை சற்று தளர்ந்தது. ஆனால் கோட்டா ஆட்சிகாலத்தில் மீண்டும் இறுகியது. கடந்த இரு வருடங்களில் அவ்வாறான இறுக்கம் இல்லை. முற்றாக மாறிவிட்டது எனக் கூறவில்லை.
எனவே, ஆட்சிமாற்றத்தின் பிறகு தமிழர்களுக்கு அநீதி இழைக்காத தரப்பு ஆட்சிக்கு வந்தால் இணக்க அரசியல் நடத்துவது பற்றி கட்சியின் மத்தியக்குழு ஆராயவேண்டும்.” – என்றார்.
